Sotta Seıitqazy Mataev isiniń jaı-japsary aıtyldy
ASTANA. QazAqparat - Seıitqazy Mataev pen onyń uly Áset Mataevtyń isi boıynsha sot talqylaýy aıasynda «Qazaqtelekom» AQ basqarma múshesi, strategııalyq basqarý boıynsha bas dırektory Batyr Mahanbetájıev sottaǵy basty aıypkerdiń «Qazaqtelekom» AQ qarjysyn qalaı jymqyrǵanyn aıtyp berdi.
«Shamamen 2010 jyldyń aıaǵy men 2011 jyldyń basynda maǵan Seıitqazy Mataev keldi. Buǵan deıin jaqyn tanys emes edik, men ony syrttaı tanıtynmyn. Ol menen «Ulttyq baspasóz ortalyǵy» qoǵamdyq birlestigine adal nıetpen qaraýymdy ótindi jáne «Qazaqtelekom» AQ qyzmeti týraly materıaldardy jarııalaý qyzmetin kórsetetinin, 2007 jyldan beri esh másele týyndamaǵanyn habarlady», - dedi B. Mahanbetájıev.
Túsinikteme arqyly onyń S.Mataev ótinishine kelisim bergeni jáne tender ótkizgende oǵan barynsha kómektesýge ýáde bergeni anyqtaldy. Sonymen birge, olar aldaǵy ýaqytta atqarylǵan jumys aktilerine tez qol qoıýǵa, qarajatty ýaqytynda tóleýge jáne ózge de máselelerdi sheshýge ýaǵdalasqan.
«2011 jyldyń kókteminde «Qazaqtelekom» AQ qyzmeti týraly buqaralyq aqparat quraldaryna jarnamalyq-aqparattyq materıaldardy ornalastyrý boıynsha qyzmetterdi satyp alý jónindegi tender ótkizildi. Biraq, tender ótti dep sanalmady. (....) Sodan keıin «Ulttyq baspasóz ortalyǵy» qoǵamdyq birlestigimen kelisimshart jasaý týraly sheshim qabyldandy», - dep uǵyndyrdy «Qazaqtelekom» AQ ókili.
Óz túsiniktemesinde B. Mahanbetájıev konkýrstyq ótinimderdegi baǵalardyń BAQ bekitken praıs-lıstten emes, S.Mataev jasaǵan «Ulttyq baspasóz ortalyǵy» QK ótiniminen alyp kórsetilgenin aıtty.
Batyr Mahanbetájıev atqarylǵan jumys aktilerin teksermegenin moıyndady. S.Mataevtyń ar-uıatyna sengendikten tekseris júrgizbegenin aıtty. Aqyrynda qyzmetterdiń kóterińki baǵamen jazylǵany anyqtaldy.
Atap ótken jón, Qylmystyq kodekstiń 65-babyna sáıkes, shyn ókinip, tergeýge kómek bergeni úshin «Qazaqtelekom» AQ qyzmetkerleri qylmystyq jaýapkershilikten bosatyldy.
Tergeý boıynsha, Seıitqazy Mataev «Qazaqtelekom» AQ-nyń 143 mln teńge qarajatyn jymqyrǵan.
