Sotta Rýslan Berdenovke qastandyq jasaý sátiniń beınejazbasy kórsetildi
ShYMKENT. KAZINFORM — Shymkent qalasy ákiminiń orynbasary Rýslan Berdenovke jasalǵan qastandyqqa baılanysty qozǵalǵan qylmystyq is boıynsha sot otyrysynda beınejazbalar men zattaı aıǵaqtar usynyldy.
Sot zalyndaǵy ekrannan qylmys ornynda túsirilgen beınejazba kórsetildi. Onda tárkilengen aıǵaqtar, sonyń ishinde kúdiktiniń avtokóligindegi zattar beınelengen. Dálelder qatarynda: uıaly telefon, «Saıga» qarýynyń qaptamasy, optıkalyq kózdeýish bar.
Sondaı-aq sotta ákimdik beınebaqylaý kameralaryna jazylǵan Jıembaıdy ustaý sáti kórsetildi. Kadrlarda kúdiktiniń jaıaý júrginshiler ótkeli mańynda ustalǵany kórinedi. Ol qarýsyz bolǵan, jerge jatqyzylǵan. Ustaý operatsııasyna polıtsııa qyzmetkerleri jáne Rýslan Berdenovtiń áriptesteri qatysqan.
Jazbanyń basqa bólikterinde Rýslan Berdenovtiń ákimdik ǵımaratynan shyǵyp kele jatqan sáti beınelengen. Ol baspaldaqpen túsip, kóligine qaraı bet alady. Dál osy kezde oǵan Ernar Jıembaı jedel jaqyndaıdy. Berdenov sheginýge tyrysqanymen, birneshe sekýndtan keıin Jıembaıdyń qasyna bir kólik kelip toqtap, ishinen júrgizýshi shyǵady. Osy sátte Jıembaı jerge qulaıdy.
Kelesi sot otyrysy 15 tamyzǵa belgilendi.
Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.