Sotta prokýror Bek Air ushaǵynyń apatyna kimder kináli ekenin aıtty
ALMATY. KAZINFORM – Túrksib aýdandyq sotynda 2019 jyly bolǵan Bek Air ushaǵynyń apatyna qatysty sottyń jaryssózi ótti.
Sot zalynda aıyptalýshylar oryndyǵy bos tur. Sebebi is boıynsha aıyptalýshylar retinde kórsetilgen ushqyshtar - Meıirjan Moldaqulov pen Marat Muratbaev apat kezinde qaza tapty.
Jaryssóz kezinde prokýror Aıdos Palmanov ushaq apatyna áýe kemesin basqarǵan ushqyshtar kináli ekenin aıtty.
– Áýe apaty saldarynan 13 adam qaza tapty. 53 adam ártúrli dene jaraqatyn aldy: 10 adam aýyr, 19 adam ortasha, 21 adam jeńil jaraqat aldy. Taǵy 3 adam soqqy men jaraqat alǵan, biraq olardyń densaýlyǵyna kelgen zııan dárejesi anyqtalmaǵan. Sottan ushqyshtar - Marat Muratbaev pen Meıirjan Moldaqulovty kináli dep tanyp, olardyń qaıtys bolýyna baılanysty qylmystyq jaza qoldanbaýdy, al jábirlenýshilerdiń azamattyq talaptaryn tolyq kólemde qanaǵattandyrýdy suraımyn. «Bek Air» AQ-nan jábirlenýshilerdiń paıdasyna moraldyq jáne materıaldyq zalal retinde 4 870 292 195 teńge jáne 7 myń AQSh dollaryn óndirip berýdi suraımyn, - dedi memlekettik aıyptaýshy.
Prokýrordyń aıtýynsha, ekıpaj músheleri Qazaqstannyń avıatsııalyq normatıvtik aktileriniń, ushaqtyń tehnıkalyq jáne paıdalaný qujattarynyń, áýe kemesin paıdalaný jáne tehnıkalyq qyzmet kórsetý jónindegi nusqaýlyqtardyń, sondaı-aq ICAO (Halyqaralyq azamattyq avıatsııa uıymy) standarttary men Bek Air kompanııasynyń ishki qujattarynyń talaptaryn buzǵan.
– Bul erejelerdiń saqtalmaýy saldarynan áýe kemesi qanattarynda muz jáne qardyń jınalǵan. Bul jaǵdaı ekıpajdyń muzdaný jaǵdaıyndaǵy qate is-áreketterimen qosylyp, adam ólimine ákelgen apatqa sebep boldy, - dedi ol.
Sonymen qatar apat saldarynan Almaty halyqaralyq áýejaıyna jalpy somasy 22 895 256 teńge materıaldyq shyǵyn keltirilgeni habarlandy.
– Áýe kemesiniń komandıri Muratbaev pen ekinshi ushqysh Moldaqulov uzaq jyldyq tájirıbesine senip, óz kásibı daǵdylaryna arqa súıeı otyryp, nemquraılyq pen ózimshildik tanytqan. Olar óz áreketiniń qaýipti saldaryn aldyn ala boljasa da, tehnıkalyq qujattamanyń talaptaryn oryndamaǵan. Osylaısha áýe kóligin paıdalaný erejelerin buzyp, abaısyzda eki jáne odan da kóp adamnyń ólimine, sondaı-aq aýyr jáne ortasha dene jaraqattaryna jáne iri kólemdegi materıaldyq zalalǵa ákelgen. Bul áreket Qylmystyq kodekstiń 344-babynyń 3-bóligi boıynsha baǵalanady, — dedi prokýror.
Buǵan deıin sotta Bek Air ushaq apatynyń sebebin dálirek anyqtaý úshin jasandy ıntellekt saraptamasyn paıdalaný usynyldy. Sondaı-aq sot Bek Air áýe kompanııasynyń múlkine shekteý qoıdy.
Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.
2021 jyly Almaty oblysynyń Talǵar aýdandyq soty áýejaı mańyndaǵy jer ýchaskelerin zańsyz satqan burynǵy sheneýnikter men rıeltorǵa qatysty úkim shyǵardy.