Sotta Muhtar Ábilázovtiń taǵy bir qylmystyq jelisi áshkerelendi
Búgin tústen keıin jalǵasqan sot otyrysynda aıyptaýshy tarap Muhtar Ábilázovke BTA bankten shamamen 145 mıllıon AQSh dollaryn jymqyrýǵa múmkindik týǵyzǵan qylmystyq kestege kelip toqtady. Bul alaıaqtyq áreket Seıshel araldarynda tirkelgen «Toros Ltd» kompanııasynyń kómegimen júzege asyrylǵan.
«2006 jyldyń 7-shi jeltoqsanynda «Toros Ltd» kompanııasynyń dırektory Djennıfer Rene «TuranÁlembanki» AQ-nan banktiń atqarýshy dırektory A. Janqulıevanyń atyna nesıe alýǵa ótinish bergen. Osy ótinishte atalǵan tulǵany 144 mıllıon AQSh dollary kólemindegi somaǵa qarjylandyrý múmkindikterin qarastyrý týraly jazylady»,- dep habarlady sot otyrysynda zardap shekken taraptyń ókili Talǵat Amantaı.
Bankten alǵan nesıege Reseı Federatsııasynyń Máskeý oblysynan 11 jer ýchaskelerin satyp alý kózdelgen. Sonymen qatar, ótinishte qarajattyń «Mitchell Technologies» kompanııasynyń 100 paıyzdyq aktsııasyn satyp alýǵa qajet bolǵandyǵy anyq kórsetilgen. Atap aıtarlyǵy, joǵaryda atalǵan kompanııalardyń barlyǵy bir kúndik is-áreket úshin qurylǵany belgili. Muhtar Ábilázov ol kompanııalardy jalǵan tulǵalar arqyly baqylaýda ustaǵany málim boldy.
Saıyp kelgende, bankte burynnan qalyptasqan ishki talaptar óreskel buzylady. Mysaly, kepildikke eshqandaı múlikti qoımastan banktiń aımaqtyq nesıe komıteti atalǵan qaryzdy berý týraly sheshim qabyldaıdy. Nemquraıdylyqpen shyǵarylǵan sheshim boıynsha barlyq qujattarǵa qol qoıylǵannan (BTA bankte mundaı is-áreketter syrttaı júzege asyrylyp otyrǵan) keıin, «Toros Ltd» kompanııasynyń shotyna 144 mıllıon AQSh dollary aýdarylady.
Alaıda aqsha jymqyrý kestesi munymen bitpeıdi. 2008 jyldyń 29-shy sáýirinde «Toros Ltd» kompanııasy óziniń «BTA banki» AQ-nyń aldyndaǵy qaryzyn «Brocley Holding SARL» kompanııasyna aýdarady. Sol kezeńde «Toros Ltd» kompanııasynyń qaryzynyń kólemi shamamen 128 mıllıon AQSh dollaryn quraǵan. Sodan keıin Muhtar Ábilázovtiń uıymdasqan qylmystyq qaýymdastyǵynyń jetekshileri urlanǵan asa qomaqty aqshany sheteldik bankterdiń ártúrli shottaryna aýdaryp otyrǵan.
Aıta ketelik, qashqyn bankır Muhtar Ábilázovtiń qylmystyq isi boıynsha basty sot otyrysy aǵymdaǵy jyldyń 3-inshi sáýirinde bastaldy. Oǵan Almaty qalasyndaǵy qylmystyq ister jónindegi mamandandyrylǵan aýdanaralyq sottyń tóraǵasy Martbek Kákimjanov tóraǵalyq etýde. Sot otyrystaryna úsh memlekettik aıyptaýshy, sottalýshylardyń qorǵaýshylary jáne BTA bankiniń ókili qatysýda. Qylmystyq istiń jalpy kólemi 2 224 tomnan turady. Aıyptaýshylar tiziminde 200-den astam kýágerler bar. Muhtar Ábilázovtiń ózi alǵashqy sot otyrysynan bastap sotqa kelgen joq. Onyń múddesin memleket belgilegen qorǵaýshy Anjelıka Ájiǵulova qorǵaıdy. Aıtpaqshy, alǵashqy sot otyrysynda-aq sottalýshylar men qorǵaýshylardyń eshqaısysy qylmystyq isti bas fıgýranttyń qatysýynsyz qaraýǵa qarsylyq bildirgen joq.
