Sotta Mataevtarǵa memlekettik aqparattyq tapsyrystyń zańsyz berilgeni aıtyldy
ASTANA. QazAqparat - Seıitqazy jáne Áset Mataevtarǵa tıesili «QazTAG» HAA memlekettik tapsyrys tenderlerin zańsyz utyp alǵan. Bul týraly Baılanys, aqparattandyrý jáne aqparat komıteti merzimdi basylym BAQ basqarmasynyń burynǵy jetekshisi Janbolat Baıbosynov málimdedi.
Janbolat Baıbosynov ózine 2014 jylǵa arnalǵan memlekettik aqparattyq saıasat júrgizý boıynsha qyzmet satyp alýlarynyń konkýrsyna lottardy daıyndaý mindeti júktelgenin aıtty. Memlekettik satyp alýlar boıynsha «QazTAG HAA» JShS kelisimshart bekitýdi qamtamasyz etý úshin lottardyń birin aldyn ala daıyndaý qajet boldy.
«Ekinshi lot «QazTAG HAA» JShS arnalǵan edi. Sebebi, arnaıy jasalǵan tehnıkalyq erekshelikke sáıkes, ekinshi lot talaby boıynsha, materıaldardy KırTAG, ÝzTAG, AfTAG jáne TadjıkTAG sekildi Ortalyq Azııa aqparattyq agenttikterine jarııalaý kerek. Sodan keıin konkýrs jarııalandy, alaıda bir ǵana jetkizýshi - QazTAG-tan ótinim túskendikten, konkýrs bolǵan joq jáne sol jetkizýshi arqyly satyp alýlardy júzege asyrý týraly sheshim qabyldandy», - dedi kýáger.
Ózge sózben aıtqanda, oınatylǵan lottyń tehnıkalyq ereksheligi «QazTAG HAA» JShS úshin arnaıy jasalǵan.
Janbolat Baıbosynov «QazTAG HAA» JShS kórsetken qyzmetterdiń memlekettik aqparattyq tapsyrysty júzege asyrýdyń tehnıkalyq erekshelikterine saı kelmegenin atap ótti. Sonymen birge, Baıbosynovtyń ózi Mataevtar tarapynan bolǵan zań buzýshylyqtardy basshylyqqa birneshe ret aıtyp, eskertken. Alaıda Baılanys, aqparattandyrý jáne aqparat komıtetiniń burynǵy tóraǵasy Talǵat Qazanǵap S.Mataevtyń abyroı-bedeline senim artyp, barlyq eseptemeni teksermeı, qol qoıǵan.
«Aktiler men eseptemelerge qol qoıdym. Biraq, S.Mataevtyń abyroı-bedeline senim artyp, atqarylǵan jumys kóleminiń naqtylyǵy, esepterdiń durystyǵy jáne tehnıkalyq erekshelik pen kelisimshart talaptaryna sáıkestigin teksermedim», - degen edi T.Qazanǵap.
Aıta keteıik, jymqyrylǵan aqshanyń kólemi 169 mıllıon teńgeni quraǵan.
