Sotta Qýandyq Bıshimbaevtyń isi boıynsha sottalýshylar men kýágerlerden jaýap alynyp jatyr
ASTANA. QazAqparat - Astanada Qazaqstan Respýblıkasynyń burynǵy ulttyq ekonomıka mınıstri Qýandyq Bıshimbaevtyń isi boıynsha sot talqylaýynda sottalýshylar men kýágerlerden jaýap alý bastaldy, dep habarlaıdy «QazAqparat» HAA tilshisi.
«Sot, otyrysta protsess qatysýshylarynyń pikirin tyńdap, QR Qylmystyq-protsessýaldyq kodeksiniń 344-babyn basshylyqqa ala, qaýly etedi: sot tergeýi aıybyn moıyndaıtyn sottalýshylardan, epızodtar boıynsha kýágerlerden, tizimge sáıkes, aıybyn moıyndamaıtyn sottalýshylardan jaýap alýdan bastalsyn, keıin is boıynsha jazbasha jáne zattaı aıǵaqtar tekserilsin», - dedi Astana qylmystyq ister jónindegi mamandandyrylǵan aýdanaralyq sotynyń sýdıasy Ádilhan Shaıhıslamov sot otyrysynda.
Jaýap alý «Báıterek Development» AQ-nyń burynǵy basqarma tóraǵasy Baqyt Jaqsybaevtan bastaldy. Osy is boıynsha 20-dan astam adam jaýapqa tartylǵan.
Eske sala ketsek, 31 qazanda QR Ulttyq ekonomıka mınıstrliginiń burynǵy basshysy Qýandyq Bıshimbaevtyń isi boıynsha aldyn ala tyńdaý ótti.
10 qańtarda Sybaılas jemqorlyqqa qarsy Ulttyq bıýro burynǵy Ulttyq ekonomıka mınıstri Qýandyq Bıshimbaevtyń ustalǵanyn habarlaǵan bolatyn. Ulttyq bıýrodan málim etkendeı, ol birqatar adammen aldyn ala kelisip, iri kólemde birneshe márte para aldy dep aıyptalýda. Bıshimbaev Qyzylorda qalasynda áınek shyǵaratyn jáne óńdeıtin zaýyt salý barysynda «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrdy degen kúdikke ilindi. 12 qańtar kúni Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanktsııa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajattaryn jeke qajettilikterine jumsaǵan.
