Sotta «Qazáýequtqarý» basshysynyń mıllıondaǵan qaryzy men qymbat issaparlary belgili boldy
ALMATY. QazAqparat - Sotta «Qazáýequtqarý» basshysynyń mıllıondaǵan qaryzdary men issaparlary týraly aıtyldy, dep habarlaıdy QazAqparat tilshisi.
Sot talqylaýynda «Qazáýequtqarý» bas dırektory Málik Dosymbekov 2017 jyly mamyr aıynda Shyǵys Qazaqstanda ótken oqý-jattyǵýǵa barǵanynda ózine jáne kómekshisine 5 mln teńge aýdartqany aıtyldy.
«Biz onyń issaparyna qajetti jol shyǵyndary men qonaq úı shyǵynyna 185 myń teńge aýdarýymyz kerek bolǵan. Biraq, 170 myń teńge aýdardyq. Dosymbekov meni kabınetine shaqyryp alyp, qyzmettik ótinishsiz oǵan 3 mln teńge aýdarý kerektigin, jaýapkershilikti ózine alatanyn aıtty. Men tólem qaǵazyna qol qoıýdan bas tarttym. Oǵan ózi qol qoıdy. Sonymen qatar, onyń tapsyrmasymen Muqashevke 2 mln teńge aýdardyq», - dedi sotta kýálik etken «Qazáýequtqarý» AQ bas esepshisiniń orynbasary.
Bul aıyptaýǵa qatysty Dosymbekov óz ýájin aıtty. Onyń aıtýynsha, bul aqsha issapar shyǵyny emes, esepte turǵan, qaıtarylatyn aqsha retinde alynǵan. Dálel retinde, Muqashev bul somanyń barlyǵyn qaıtarǵanyn aıtty. Al Dosymbekov jartylaı qaıtarǵan.
Sonymen qatar, sot-ekonomıkalyq saraptama qorytyndysynda Dosymbekovtiń «Qazáýequtqarý» AQ-nan 76 mln teńge qaryz alǵany kórsetilgen. Sondaı-aq, 6 792 372 teńge syıaqy alǵan. Jalpy alǵanda sottalýshy aktsıonerlik qoǵamǵa 82 792 372 teńge qaryz ekeni aıtylǵan.
«Aýdıt júrgizildi. Onyń 85 mln teńge alǵany belgili boldy. Eń negizgisi, ol (Dosymbekov-red) muny dırektorlar keńesimen kelispeı alǵan. Ol somany qaıtarýy tıis. Qazirgi ýaqytta 4 mln teńge ǵana aqsha qaıtaryldy. Sondaı-aq, onyń issaparyna 5 mln teńge bólingen. Ol bizdiń aktsıonerlik qoǵamymyzǵa 85 mln teńge berýi qajet», - dedi jábirlenýshi taraptyń ókili «Qazáýequtqarý» AQ-nyń ońtsútik aımaqtyq fılıalynyń dırektory Qazbek Maqajanov.
Eske sala keteıik, «Qazáýequtqarý» dırektory Málik Dosymbekov pen «Qazáýeormanqorǵaý» basshysy Tóleýǵazy Seksenbaev Qytaı kompanııasynyń ókili Lı Hýaodan «Mı - 171E» tikushaǵyn jetkizý týraly kelisimge qol qoıý úshin 100 myń AQSh dollary kóleminde para berýdi surap, 2017 jyldyń 10 maýsymynda 50 myń AQSh dollaryn alý kezinde qolǵa túsken.
