Sotta Hrapýnov pen Ábilıazovtiń qylmystyq sulbasy áshkerelendi
ASTANA. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilázov pen onyń sybaılastaryna qatysty qylmystyq isti qaraý odan ári jalǵasýda.
Sottyń búgingi otyrysynda Muhtar Ábilıazovtyń Hrapýnovtar otbasynan satyp alǵan «Building Service Company» kompanııasyna kóp mıllıardtaǵan nesıe berýi týraly oqıǵa qaraldy.
Jábirlenýshi taraptyń ókili áýeli «Building Service Company» kompanııasyn kim jáne qalaı qurǵanyna toqtaldy. Bul oqıǵanyń basy qazirgi kezde ádilettilikten qashyp, Shveıtsarııada jasyrynyp júrgen Vıktor Hrapýnovtyń Almaty qalasynyń ákimi bolǵan kezinen bastalady. Qala basshysynyń qyzmetin atqarǵan kezinde Vıktor Hrapýnov eń aldymen, «memleket qajetine» jeke menshik qojaıyndarynan jer ýchaskelerin tartyp alýǵa qatysty shýly oqıǵalarmen eldiń esinde qaldy. Memleket osylaısha jer ýchaskelerin ózine qaıtardy. Aıtarlyǵy, memleketke qaıtarylǵan ýchaskeler men jyljymaıtyn múlikter tabıǵat qorǵaý aımaqtary men Almatynyń bedeldi aýdandarynda ornalasty. Tartyp alynǵan múlik kóp uzamaı Hrapýnovtyń óziniń baǵynyshty fırmalaryna satý úshin saýdaǵa shyǵaryldy. Solardyń biri, Vıktor Hrapýnovtyń áıeline tıesili bolǵan «Building Service Company» kompanııasy edi.
Alaıda, 2003 jyldyń qazan aıynda Láılá Hrapýnova «Building Service Company» kompanııasyndaǵy óziniń 100 paıyzdyq úlesin satyp, odan túsken qarajatty qyzy Elvıranyń atyna Shveıtsarııadaǵy bankterdiń birinde ashylǵan shotqa aýdarady. Atalǵan kompanııanyń is júzindegi qojaıyny Muhtar Ábilıazov bolyp shyǵa keledi. Aıta ketelik, Ábilıazovtar men Hrapýnovtar quda bolǵan áýletter: Іlııas Hrapýnov Mádına Ábilıazovaǵa úılengeni málim. Tergeýdiń málimetterine qarasaq, osynaý otbasylyq mámileniń quny 2 mıllıardtan astam teńgeni quraǵan. Biraq Muhtar Ábilıazov bul shyǵynynyń ornyn keıinierek artyǵymen toltyrdy.
Arada biraz ýaqyt ótkende ol «Building Service Company» kompanııasynyń qarajatyn ózine baǵynyshty basqa kompanııalarǵa bóledi. Óıtkeni, ol kompanııalar da BTA bankten birneshe mıllıondaǵan nesıeler alyp, qaıtarmaǵan bolatyn.
2007 jyly BTA bankte buǵan deıin jolǵa qoıylǵan qylmystyq keste boıynsha «Building Service Company» kompanııasynyń atynan 45 mıllıon AQSh dollary kóleminde nesıelik jeli ashýǵa ótinish jasalady. Árıne, ony maquldaýǵa kelgende eshqandaı másele týyndaǵan joq. Nesıe komıteti eshqandaı saraptama júrgizbedi, qaryz alýshynyń ózin jáne nesıe alý tarıhyn teksergen joq. Óıtkeni, bank qyzmetkerleri qaryz alýshy kompanııanyń is júzindegi qojaıyny kim ekenin jaqsy biletin edi. Sol sebepten «Building Service Company» kompanııasyna jedel nesıe berý týraly sheshim shyǵaryldy.
Kóp uzamaı «Building Service Company» kompanııasynnyń shotyna BTA bankten qomaqty nesıe aqsha túse bastady. Biraq ol aqsha bankke sol kúıi qaıtarylmady. Al, Muhtar Ábilıazov bolsa urlanǵan mıllıondar men mıllıardtaryn zańdastyryp, óziniń jeke basynyń qajettilikterine jumsady.
Aıta ketelik, qashqyn bankır Muhtar Ábilázovtiń qylmystyq isi boıynsha basty sot otyrysy aǵymdaǵy jyldyń 3-inshi sáýirinde bastaldy. Sot otyrystaryna úsh memlekettik aıyptaýshy, sottalýshylardyń qorǵaýshylary jáne BTA bankiniń ókili qatysýda. Qylmystyq istiń jalpy kólemi 2 224 tomnan turady.
