Sotta Gúlderaıym Omarovanyń qalaı óltirilgeni jaıly aıtyldy
ALMATY. QazAqparat - Almatyda qylmystyq ister boıynsha mamandandyrylǵan aýdanaralyq sotynda Rahman Omarovtyń burynǵy áıeli Gúlderaıym Omarovanyń ólimine qatysty istiń aldyn ala tyńdalymy ótti, dep habarlaıdy QazAqparat tilshisi.
Otyrys barysynda memlekettik aıyptaýshy aıyptaý aktisin oqydy.
"25-maýsymda túski 14.00 shamasynda Gúlderaıym Omarova jalǵa beretin páterine páteraqysyn (99 myń teńge) alýǵa kelgen. Sol sátte úıde aıyptalýshy Aqtolqyn Súleımenova bolǵan. Birazdan soń ekeýiniń arasynda urys-keris bastalady. Sonyń kesirinen Súleımenova as úı pyshaǵyn ala júgirip, Omarovanyń moınynyń bir jaq búıirinen, aldyńǵy tusynan birneshe ret pyshaq urǵan" - dedi prokýror Ermek Qashaǵanov.
Onyń sózine qaraǵanda, kúdikti kóp uzamaı áıeldiń qımylsyz qalǵanyn kóip, deneni balkonǵa shyǵaryp, marqumnyń basyn paketke orap qoıǵan. Al sol kúni keshki 18:00 shamasynda marqumnyń balasy Doshan Kákimov álgi páterge anasyn izdep kelip, esikti uzaq qaqqan. Keıinnen kúdikti Súleımenova oǵan anasynyń ketip qalǵanyn aıtqan. Alaıda ol buǵan senbeı úıdiń bólmelerin qarap shyqpaq bolady.
"Keıinnen Kákimov anasynyń qanǵa bókken denesin kórip, syrtqa qashýǵa árekettengen. Alaıda Súleımenova qylmysyn jasyrý maqsatynda ony da óltirmek oımen pyshaq ala júgirgen. Eki aradaǵy kıkiljiń barysynda áıeldiń qolyndaǵy pyshaq Kákimovtyń saýsaǵyn kesip ketken. Abyroı bolǵanda,Doshan páterden sytylyp shyǵa alypty. Osylaısha Súleımenova Aqtolqyn QR QK 99-babynyń 1-bólimimen, 24-babynyń 3-bólimimen, 99-babynyń 2-bólimimen qarastyrylǵan qylmys jasady dep aıyptalyp otyr", - dedi prokýror Ermek Qashaǵanov.
Al sottalýshynyń advokaty Ýmarov qylmystyq isti prokýrorǵa qaıtarýdy surady. Onyń pikirinshe, aıyptaý aktisinde jazany jumsartý máseleleri qarastyrylmaǵan.
"Súleımenova óziniń kinásin tolyq moıyndap, istegenine ókinip otyr. Ol Omarovanyń balasyn óltirgisi kelmegen. 24-baptyń 3-bólimi negizsiz qosylyp otyr. Alyp tastaýyńyzdy suraımyn. QR QK 99-babynyń 1-tarmaǵyn QR QK 106-babyna aýystyrýdy suraımyn. ıAǵnı, meniń qorǵaýymdaǵy áıel Omarovany óltirgisi kelmegen. Ol Omarovanyń densaýlyǵyna qasaqana zııan keltirdi. Biraq ádeıi óltirgisi kelgen joq", - dedi advokat Ýmarov.
Alaıda sýdıa Ýmarovtyń ótinishin qanaǵattandyrmady. Basty sot otyrysy 5 qarashada 15.00-de ótetin boldy.
Sotqa jábirlenýshi retinde marqumnyń ápkesi men uly Doshan Kákimov qatysyp otyr.
Qaıǵyly oqıǵa 2018 jyldyń 25 maýsymynda bolǵan edi.
Gúlderaıym Omarova Aqkent shaǵynaýdanyndaǵy páterin jalǵa berip kelgen. Maýsymnyń 26 kúni ol jalǵa alý aqysyn alý úshin páter jaldaýshylaryna barǵan.
Sol kezde páter qojaıyny men jaldaýshylar arasynda urys paıda bolǵan.
Daý-damaıdyń arty qaıǵyly jaǵdaıǵa ulasty.
