Sotta Ernar Jıembaı Rýslan Berdenovten birneshe márte keshirim surady

ShYMKENT. KAZINFORM — Shymkent qalasy ákiminiń orynbasary Rýslan Berdenovke jasalǵan qastandyq isi boıynsha sot tyńdalymy jalǵasyp jatyr. 

Otyrysta aıyptalýshy Ernar Jıembaı sóz alyp, jábirlenýshiden birneshe ret keshirim surady.

— Sizden keshirim suraımyn, denińizge saýlyq tileımin. Osyndaı oqys oqıǵa bolyp qaldy. Óltirgim kelmedi. Óltirýge nıetim de bolǵan joq. Sizdi syılaımyn, qurmetteımin. Osy oqıǵa bolsa da, bolmasa da, sizdi ómirimniń sońyna deıin qurmetteımin. Alla jazsa, bostandyqqa shyqsam, er jigit retinde aldyńyzǵa kelip keshirim suraımyn, — dedi ol.

Alaıda Rýslan Berdenov aıyptalýshy ádil jazasyn alýy kerek dep talap etti.

— Seniń alǵashqy atqan oǵyń týra basyma baǵyttaldy. Bul beınematerıaldardan da kórinip tur. «Óltirgim kelmedi» degeniń jalǵan áńgime. Meni Allanyń qudireti ǵana qutqardy. Ókpemniń 20 paıyzy alynyp tastaldy, baýyrymdy shashyp, qaıta jınady, bes saǵat boıy ota jasaldy, — dedi jábirlenýshi.

Al Ernar Jıembaı sózinde otbasy men bala-shaǵanyń bir-birimen jaýlasyp ketpeıin qalaıtynyn aıtyp, kinásin moıyndady.

— Rýslan Arysbekuly, sizden keshirim suraımyn. Meniń kesirimnen eki otbasy, bala-shaǵamyz jaýlasyp ketpesinshi. Ótinishim sol ǵana. Temir tordyń arjaǵyna ketip baramyn. Kináli menmin, — dedi ol.

Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.