Sotta Áset Mataevtyń múlikteriniń tizimi jarııalandy
ASTANA. QazAqparat - Astanada bıýdjet qarajatyn iri kólemde jymqyrdy, jyldar boıy salyq tóleýden jaltardy degen aıyptar taǵylǵan Seıitqazy jáne Áset Mataevtardyń isi boıynsha sot otyrysy jalǵasyp jatyr.
Búgingi sot otyrysynda Áset Mataev elıtaly jyljymaıtyn múlik pen qymbat avtokólikterden tyıym salýdy alyp tastaý týraly sotqa ótinish bildirdi.
Sýdıa Aqbolat Qurmantaev Áset Mataevtyń ıeliginde Mitsubishi Pajero, Toyota Land Cruiser jáne Lexus 570 avtokólikteri bar ekenin jarııalady. Sondaı-aq, kishi Mataevta Almaty qalasynyń elıtaly Samal aýdanynda ornalasqan páter bar. Aıyptalýshy Mataev joǵaryda atalǵan múlikterdiń ózine tirkelgenin moıyndady.
Tergeý Mataevtardyń 2011-2015 jyldary memlekettik saıasatqa aqparattyq qoldaý kórsetý jáne basylym betterine jarnamalyq materıaldardy jarııalaý úshin Aqparattandyrý komıteti men «Qazaqtelekom» AQ bólingen 300 mıllıon teńgeden astam qarajatty jymqyrǵanyn anyqtady.
Dál osy maqsatta, tergeý nusqasy boıynsha, «QazTAG HAA» JShS jáne «Ulttyq baspasóz ortalyǵy» QB zańsyz kelisimsharttar bekitilgen. Tapsyrys berýshilerdiń basty sharty júrgizilip jatqan memlekettik saıasat jaıly halyqty aqparattandyrý bolatyn.
Alaıda, memleket qarjysyn tólegen BAQ-qa jarııalanǵan aqparattar únemi qoǵam úshin jabyq rejımde jaryq kórgen, ol aqparatty oqý úshin qosymsha aqy tóleý qajet bolǵan. Óz kezeginde tergeý organdary «Qazaqtelekom» AQ aldyndaǵy mindetterdi óz moınyna alǵan S.Mataev múldem jumys istemegen dep esepteıdi. Aqparattandyrý komıteti men «Qazaqtelekom» AQ aýdarǵan qarajatty S.Mataev ózi ıemdengen. Aqparattandyrý komıtetinen 169 mln teńge, al «Qazaqtelekom» AQ bıýdjetinen - 143 mln teńge.
Sonymen birge, tergeý kásipkerlikpen aınalysqan Mataevtyń 1,4 mlrd teńge paıda taýyp, 200 mln teńgeden astam salyqtan jaltarǵanyn anyqtady.
