Sotta advokat Arystanbek Muhamedıulyn úıqamaqqa aýystyrýdy surady

ASTANA. QazAqparat – Advokat burynǵy Mádenıet jáne sport mınıstri Arystanbek Muhamedıulyn qamaýda ustaý tártibin úıqamaqqa aýystyrýdy surady, dep habarlaıdy QazAqparat tilshisi.

Bıyl aqpan aıynda QR Ulttyq mýzeıiniń eks-dırektory A.Muhamedıulyn qamaýda ustaý merzimi 2 aıǵa uzartylǵan edi.

Aıta keteıik, Sot protsesi Baıqońyr aýdandyq №2 sotynda qaralyp jatyr. A. Muhamedıuly sot otyrysyna onlaın rejımde qatysyp otyr. Sebebi elordada qardyń qalyń túsýine baılanysty ol sot ótip jatqan ǵımaratqa jetkizilmedi.

«Advokatyńyz qylmys quramynyń bolmaýyna baılanysty sizge qatysty qylmystyq isti toqtatý jónindegi máseleni sheshý týraly ótinishpen júgindi. Sondaı-aq sizge qatysty bultartpaý sharasyn úıqamaqqa ózgertýdi surady», - dedi sýdıa Baǵlan Ydyrysov sot otyrysynda A. Muhamedıulyna qarata aıtqan sózinde.

Óz kezeginde QR Ulttyq mýzeıiniń eks-dırektory osyǵan deıin atalǵan máselege qatysty tıisti ótinish jasalǵanyn aıtty.

«Úıqamaqqa aýystyrý týraly ótinish joldaǵan edik. Jaqynda maǵan ekinshi operatsııa jasaldy. Densaýlyq jaǵdaıym nasharlap keledi. Osy oraıda úıqamaqqa aýystyrý sheshimi durys bolar edi», - dedi A. Muhamedıuly.

Sonymen qatar ol bul isti qaraýdy toqtatý kerek ekenin aıtty.

«Otyrys barysynda advokattar aıtqandaı, is boıynsha eshteńe dáleldenbedi, birde-bir fakti joq. Soǵan qaramastan, biz osynda qamaýdamyz», - dedi A. Muhamedıuly.

Esterińizge sala keteıik, 2022 jyldyń 28 mamyrynda sot sanktsııasymen Ulttyq mýzeı dırektory Arystanbek Muhamedıulyna qatysty «kúzetpen ustaý» bultartpaý sharasy tańdaldy.