Sotta Ábilıazovtiń munaı-gaz jabdyǵyna qatysty qýlyq-sumdyǵy áshkere boldy
ALMATY. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilıazov pen onyń sybaılastaryna qatysty qylmystyq isti qaraý odan ári jalǵasýda. Sottyń búgingi otyrysynda Muhtar Ábilıazovtiń munaı-gaz jabdyǵyna qatysty astyrtyn áreketteri áshkerelengen oqıǵa qaraldy. Muhtar Ábilıazov jetekshilik etken uıymdasqan qylmystyq top munaıgaz jabdyǵyn satyp alýǵa qatysty qýlyq-sumdyǵynyń nátıjesinde BTA banktiń 8,6 mıllıardqa jýyq aqshasyn urlaǵan.
Memlekettik aıyptaýshynyń aıtýyna qaraǵanda, BTA banktiń basshylyǵy munaı-gaz jabdyǵyn satyp alýdy jeleý qylyp, «Propertı Akvızıshn kompanııasy» jaýapkershiligi shekteýli seriktestigine zańsyz jolmen mıllıardtaǵan teńgeni nesıege bergen. Alaıda, keıinirek málim bolǵanyndaı, «Propertı Akvızıshn kompanııasy» JShS BTA banktiń aqshasyn jymqyrý úshin qurylǵan Muhtar Ábilıazovtiń «bir kúndik» kompanııasy ekeni anyqtaldy.
Buǵan qosa, jalǵan qaryz alýshynyń barlyq qujattary Ábilıazovtiń ózi tikeleı baqylaýda ustaǵan, osyndaı astyrtyn áreketterdi júzege asyrý úshin qurylǵan №6 korporatıvtik bıznes basqarmasynda daıyndalyp, saqtalǵan. Ádettegideı, jalǵan kompanııaǵa nesıe beretin kezde eshqandaı saraptama júrgizilmeıdi jáne kepilge múlik qoıylmaıdy.
«Propertı Akvızıshn kompanııasy» JShS-niń nesıelik qujattamasynda kompanııanyń qarjylyq ahýaly, nesıe komıtetiniń saraptamasy, kepilge qoıylatyn múlikti qabyldaý týraly akti sııaqty qujattary joq,- dedi sotta prokýror Erkin Baımaǵambetov. ıAǵnı, nesıe beretin kezde banktiń barlyq bekitilgen normalary buzylǵan. Oǵan qosa, saraptamalyq ekonomıkalyq túıindeme jáne nesıelik táýekelderdi basqarýǵa qatysty taldaý jasalmaǵan.
Qylmystyq istiń materıaldarynan belgili bolǵanyndaı, ekonomıkalyq qaýipsizdik basqarmasynyń jáne zań basqarmasynyń saraptamasy Basty nesıelik kelisimge qol qoıylǵannan keıin shyǵarylǵan.
«Nesıege beriletin qarajat daıyn bolǵannan keıin: nesıeni qarjylandyrýǵa ótinish pen kompanııa dırektorynyń atynan bankke aryzhat daıyndalady. Aryzhatta 8,6 mıllıardqa jýyq teńgege qarjylandyrý jelisin ashýǵa ótinish bildirilgen. Sonymen qatar, Bas nesıelik kelisimge qosymsha kelisim jasalyp, onda jabdyqtardy kepilge qoıý týraly shart qosa tirkeledi», - dep áńgimeledi sot otyrysynda prokýror.
Basqasha aıtqanda, BTA banktiń qyzmetkerleri nesıeni is bitkennen keıin alý úshin barlyq qajetti qujattardy der kezinde daıyndap qoıypty. Osylaısha óz qoldarymen jasalǵan qylmystyń izin jasyrýǵa umtylǵan.
Túptep kelgende, BTA banktiń basshylyǵy munaı-gaz jabdyǵyn satyp alý úshin qarajattyń bankke qaıtyp kelmeıtinin bile tura, 2008 jyly 30 qazanda 8,6 mıllıard teńgege qaıtarymsyz jáne qamtamasyz etilmegen senimdemeni (aqsha saqtaýshylarǵa saqtyq kassasynan beriletin aqsha qujaty) iske qosady. Alaıda, tergeý barysynda málim bolǵandaı, atalǵan jabdyq satyp alynbaǵan. Al ony satyp alýǵa bólingen qarajat Muhtar Ábilıazovtiń latvııalyq banktegi shotyna túsedi. Keıinirek, ol urlaǵan qarjyny qolma-qol aqshaǵa aınaldyryp, óziniń jeke basynyń qajettilikterine jumsaıdy. Búgingi kúnge deıin berilgen nesıe bankke qaıtarylmaǵan.
