Sotqa joldanǵan árbir tórtinshi jemqorlyq qylmysy ishki ister organdarynyń qyzmetkerine qatysty

ASTANA. QazAqparat – Bıyl úsh aıda sybaılas jemqorlyq qylmysyna qatysy bar 414 adam anyqtaldy. Kúdiktiler sany ótken jyldyń sáıkes kezeńimen salystyrǵanda 8%-ǵa az. Atap aıtqanda byltyr uqsas kezeńinde 450 adam anyqtalǵan bolatyn, dep habarlaıdy QazAqparat Finprom.kz portalyna silteme jasap.

Finprom.kz dereginshe, 414 kúdiktiniń ishinde 307 adamǵa qatysty is – aýyr, 88 kúdiktiniń áreketi - ortasha aýyr, 16 adam - asa aýyr jáne taǵy úsheýiniń isi aýyr emes qylmystar sanatyna jatqyzylǵan.

Jemqorlyq boıynsha aıyptalǵandardyń kóbi Astanada tirkeldi - 64 adam. Byltyrmen salystyrǵanda bul kórsetkish 14,3%-ǵa kóp. Sonymen qatar, mundaı qylmystar Almaty (55 adam) men Túrkistan oblysy (37 adam), Shymkent qalasy (29 adam) jáne Aqtóbe oblysynda (27 adam) jıi anyqtalǵan.

Al, atalǵan qylmystar eń az anyqtalǵan óńirler – Ulytaý (2 adam), Abaı (2 adam), Pavlodar (6 adam) jáne Qyzylorda (8 adam) oblystary.

Kúdiktilerdiń ishinde 155 adamǵa para berdi degen aıyp taǵyldy. Taǵy 124 adam para aldy, 58 adam sybaılas jemqorlyqpen baılanysty alaıaqtyq jasady, 19 adam senip tapsyrylǵan ózgeniń múlikin ıemdendi nemese ysyrap etti, 18 adam laýazymdyq ókilettikterin asyra paıdalandy degen kúdikke ilikti.

Sybaılas jemqorlyq qylmystary úshin sotqa joldanǵan qylmystyq isterdiń 26,1%-y (61 adam) ishki ister organdarynyń qyzmetkerlerine qatysty. Sondaı-aq, 39 kúdikti ákimdikter men oǵan qarasty qurylymdyq bólimshelerde eńbek etken. Buǵan qosa, atalǵan tizimde Qarjy mınıstrliginiń 7 qyzmetkeri, Indýstrııa jáne ınfraqurylymdyq damý mınıstrliginiń 6 jumyskeri men ІІM Qylmystyq-atqarý júıesi komıtetiniń 4 mamany bar.