Sotqa qylmystyq is oryssha tússe de memlekettik tilde júrgizýge múmkindik berildi

ASTANA. KAZINFORM – Astana qalalyq soty qylmystyq is júrgizý barysynda tergeý organdarynan orys tilinde tússe de, sottalýshynyń qalaýyna qaraı memlekettik tilde qaralýyna múmkindik berdi. Bul týraly Astana qalalyq sotynyń baspasóz qyzmeti málim etti.   

Memlekettik tildiń mártebesin odan ári arttyrý maqsatynda Astana qalalyq sotynyń sýdıalary E.Ońǵarsynova jáne G.Daýleshovanyń jetekshiligimen Astana qalasyndaǵy aýdandyq polıtsııa basqarmasy basshylarymen dóńgelek ústel ótti. 

Sharada talqylanyp otyrǵan máseleniń mańyzdylyǵy atalyp ótildi.

«Tergeý organdarynan sotqa orys tilinde túsken qylmystyq isterdi qaraý barysynda, ulty qazaq sottalýshy óz jaýaptaryn ana tilinde berý týraly ótinish jasaǵan jaǵdaıda, sottar sot júrgizý tilin qazaq tiline ózgertý týraly qaýly shyǵaryp, isti ári qaraı qazaq tilinde jalǵastyrady. Kópshiliginde sottalýshylar tergeý barysynda isti qazaq tilinde júrgizý týraly aıtqanyn, alaıda tergeýshi orys tilinde jalǵastyrǵanyn túsindiredi. Osyndaı faktiler boıynsha sottar jekeshe qaýlylar shyǵarady», — delingen habarlamada. 

Astana qalalyq soty jekeshe qaýlylardyń oryndalýyna taldaý jasap, keıbir kemshilikterge toqtalyp, bul máselege muqııat kóńil aýdarý qajettigin aıtty.

Qazaq tilin damytý jáne onyń qoldanys aıasyn keńeıtý jáne sottyń tilge qatysty shyǵarylǵan jekeshe qaýlylaryn tıisinshe oryndaý sapasyn jaqsartý týraly talqylandy.

Talqylaý barysynda qatysýshylar tájirıbede qoldanylatyn pikirler men usynystar almasty.