Sotqa deıingi jeńildetilgen is júrgizýge baǵyttalǵan zań qabyldandy
/strong>-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasynyń Qylmystyq is júrgizý kodeksine sotqa deıingi jeńildetilgen is júrgizý máseleleri boıynsha ózgerister men tolyqtyrýlar engizý týraly» zań jobasy boıynsha kelispeýshilikterdi eńserý jónindegi kelisim komıssııasynyń usynystary qabyldandy.
Parlament qabyldaǵan zań Elbasynyń qol qoıýyna jiberiledi, dep habarlaıdy QazAqparat.
Atalǵan qujat kúdikti azamatqa qatysty naqty aıǵaqtary bar asa aýyr emes qylmystar boıynsha is júrgizýdiń sotqa deıingi rásimin ońaılatýǵa baǵyttalǵan. Qazirgi tańda aldyn ala anyqtaý men tergeý barlyq qylmystarǵa qatysty júrgiziledi. Óıtkeni qoldanystaǵy tergeý rásimi keńestik júıeniń tártibin saqtap qalǵan. Sonyń saldarynan qazir qylmystyq úderiske qatysýshy azamattar ishki ister jáne ózge de organdarǵa birneshe ret shaqyrylady jáne olarǵa qatysty kóptegen tergeý áreketteri júrgiziledi. Ýchaskelik ınspektorlar men tergeýshiler, anyqtaýshylar odan soń sot ókilderi barlyǵy da jaýap alady. Nátıjesinde jeńil qylmystyq iske qatysty kúdikti óziniń kinásin moıyndap, qajetti derekter jetkilikti bolsa da birneshe aı boıy tergeledi.
Osyǵan oraı, jańa zań jobasy boıynsha asa aýyr emes qylmystar boıynsha tıisti materıaldardy sottyń qaraýyna aınalasy 10 kúnniń shamasynda jiberý kózdeledi. Al sot óz kezeginde prokýror men advokattyń jáne basqa da osy úderiske qatysýshylardyń aralasýymen berilgen materıaldardy az ǵana ýaqyt ishinde qarastyryp, kúdiktiniń kinási men jazasyn belgileıdi. Sóıtip, bir jaǵynan aýyr emes qylmystardy tergeýdiń merzimi qysqaryp, jemqorlyq áreketterge tosqaýyl qoıylady.
Kelisim komıssııasynyń qaraýyna 5 usynys shyǵarylǵan bolatyn. Bulardyń 1-eýi birlesken redaktsııada, qalǵan 4-eýi Senat redaktsııasynda qabyldandy.
