Sotqa deıingi tatýlasý, bitimgershilikke kelý, medıatsııa qoldaný arqyly aıaqtalǵan isterdiń sany kúrt ósip otyr

ASTANA. QazAqparat - Sotqa deıingi tatýlasý, bitimgershilikke kelý, medıatsııa qoldaný arqyly aıaqtalǵan isterdiń sany kúrt ósip otyr. Bul týraly búgin Ortalyq kommýnıkatsııalar qyzmetinde ótken brıfıngte Joǵary sot sýdıasy Nurjan Qaıypjan málim etti.

"2014 jyly respýblıka boıynsha aýdandyq jáne oǵan teńestirilgen sottarǵa barlyǵy 1 mln 177 myń 133 azamattyq jáne ákimshilik ister kelip túsken. Bulardyń 668 myń 722 azamattyq is boıynsha, 385 myń 438 ákimshilik ister boıynsha sot sheshimderi shyǵyp, ister qaralyp aıaqtaldy. Osy ister boıynsha 98,7% sot aktileri zańdy jáne negizdi dep tabyldy", - dep atap ótti ol.

Onyń sózine qaraǵanda, 2014 jyly azamattyq ister boıynsha medıatsııa arqyly qaralǵan ister 2013 jylmen salystyrǵanda 4 ese artqan.

"Bitimgershilik, tatýlasý arqyly 13 747 azamattyq is aıaqtaldy. Bul 2013 jylmen salystyrǵanda 1,5 esege kóp degen sóz. Bul málimetterge qarasaq, osydan eki jyl buryn qabyldanǵan "Medıatsııa týraly" zań jáne ótken jyly ǵana Prezıdent Jarlyǵymen qabyldanǵan zańdardyń jumys isteı bastaǵanyn kórsetedi. Sotqa deıingi tatýlasý, bitimgershilikke kelý, medıatsııa qoldaný arqyly aıaqtalǵan isterdiń sany kúrt ósip otyr", - dedi N. Qaıypjan.