Sotqa 2 myń teńge jibergenge 353,5 myń teńge aıyppul salyndy
KÓKShETAÝ. QazAqparat - Jańa jyl merekesi qarsańynda Aqmola oblysy boıynsha Sybaılas jemqorlyqqa qarsy is-qımyl departamenti «Sybaılas jemqorlyqqa qarsy is-qımyl týraly» Zańǵa sáıkes memlekettik qyzmetshilerge, sondaı-aq olarǵa teńestirilgen adamdarǵa laýazymdyq mindetterin oryndaý kezinde syılyqtar men ózge de ıgilikter men artyqshylyqtardy qabyldaýǵa tyıym salynatynyn eske salady, dep habarlaıdy QazAqparat tilshisi vedomstvonyń baspasóz qyzmetine silteme jasap.
Vedomstvonyń deregi boıynsha, aǵymdaǵy jyly zańsyz materıaldyq syıaqy bergeni úshin birneshe jeke tulǵa jalpy somasy 1 mıllıon teńgeden astam ákimshilik jaýapkershilikke tartyldy.
Mysaly, Aqmola oblysynyń turǵyny «Qazposhta» AQ poshta baılanysy arqyly Kókshetaý qalalyq sotyna nekeni buzý boıynsha isti qaraýdy jedeldetý týraly ótinishpen hat salynǵan konvertti jáne nomınaly 2 000 (eki myń) teńge aqsha kýpıýrasyn jiberdi. Osy úshin ol 353 500 teńge aıyppul túrinde ákimshilik jaýapkershilikke tartyldy.
«Ákimshilik quqyq buzýshylyq týraly zańnamaǵa sáıkes, jeke tulǵalardyń memlekettik qyzmetshilerge jáne olarǵa teńestirilgen tulǵalarǵa zańsyz materıaldyq syıaqy, syılyqtar, jeńildikter nemese qyzmetter kórsetkeni úshin, eger bul is-áreketterde qylmystyq jazalanatyn áreket belgileri bolmasa, 200 AEK (2019 jyly 505 000 teńge) mólsherinde aıyppul salýǵa ákep soǵatynyn habarlaımyz.
Al memlekettik qyzmetkerler men olarǵa teńestirilgen adamdardyń zańsyz materıaldyq syıaqy, syılyqtar, jeńildikter nemese qyzmet alý úshin olardy usynǵan tulǵalardyń paıdasyna, eger bul áreketterde qylmystyq jaza qoldanylatyn áreket belgileri bolmasa, 600 AEK (2019 jyly 1 515 000 teńge) kóleminde aıyppul túrinde ákimshilik jaýapkershilik qarastyrylǵan», - deıdi vedomstvodan.
Sonymen qatar, atalmysh departament qyzmetkerleri azamattarǵa jemqorlyq quqyq buzýshylyqtardyń kýási bolǵan kezde dereý Sall-ortalyǵyna 1424 nómiri boıynsha (qońyraý shalý tegin), sondaı-aq, aýmaqtyq Sybaılas jemqorlyqqa qarsy is-qımyl departamentine habarlasýǵa bolatynyn eskertedi.
