Sot júıesine absolıýtti senim deńgeıi 55,2 paıyzdan 69,7 paıyzǵa deıin ósken - Aslambek Merǵalıev
ASTANA. KAZINFORM – Memleket basshysy Joǵarǵy sot tóraǵasy Aslambek Merǵalıevti qabyldady, dep habarlaıdy Aqorda.
Prezıdentke sot júıesinde bıylǵy toǵyz aıda atqarylǵan jumys nátıjeleri, sot isin júrgizý úderisin tsıfrlandyrý barysy, sondaı-aq azamattardyń sot júıesine senimin arttyrý sharalary týraly baıandaldy.
Aslambek Merǵalıev sot organdary 24,8 myń qylmystyq isti qaraǵanyn aıtty.
Azamattyq isterdiń sany 28,4 paıyzǵa ulǵaıyp, 605 myńnan asty.
Buǵan bankrottyqqa, turǵyn úı jáne jer daýlaryna qatysty talap-aryzdar men kelisimsharttyq mindettemeler boıynsha ister sanynyń artýy sebep bolyp otyr.
Sondaı-aq 29,2 myń ákimshilik is jáne 319 myń ákimshilik quqyqbuzýshylyq týraly is qaraldy.
Daýlardyń jartysyna jýyǵy medıatsııamen jáne basqa da balama joldarmen rettelgenin jetkizdi.
Kassatsııalyq sotqa 18 myńnan astam shaǵym kelip tústi. Olardy qarastyrý nátıjesinde apellıatsııalyq satyda túzetilgen sot aktileriniń sany eki ese, ıaǵnı 934-ten 1704-ke deıin ósti.
Sonymen qatar Ulttyq statıstıka bıýrosynyń málimetine sáıkes, sot júıesine absolıýtti senim deńgeıi 2023 jyldan beri 55,2 paıyzdan 69,7 paıyzǵa deıin ósken.
Memleket basshysyna sot júıesin kadrmen qamtamasyz etý týraly málimet berdi.
Prezıdent sot tóreligi sapasyn jaqsartý jáne sot júıesin jańǵyrtý sharalaryn iske asyrý qajettigine nazar aýdardy.
t.me/aqorda_resmi
