Sot júıesiniń jumysyn áli de bolsa jetildire túsý qajet - Prezıdent
sp;ASTANA. Qarashanyń 18-i. QazAqparat /Aıdar Ospanalıev/ - «Ádil sotty qalyptastyrý sapasy sońǵy on jylda qurylǵan arnaıy mamandandyrylǵan ekonomıkalyq, ákimshilik jáne ıývenaldy sottardyń negizinde birshama jaqsara tústi.
Al alqabıler sotynyń engizilýimen azamattyq qoǵam ókilderi qylmystyq sot óndirisine belsendi aralasýda», dedi búgin Elbasy Nursultan Nazarbaev Qazaqstan Respýblıkasy sýdıalarynyń V sezinde.
Prezıdenttiń aıtýynsha, elimizde 2007 jyly júzege asyrylǵan konstıtýtsııalyq reformalardyń arqasynda Qazaqstannyń ádil sot júıesi azamattardyń quqyqtaryn qorǵaý salasynda jańa, myqty tetikterge ıe boldy. Onyń ishinde, ásirese, tutqynǵa alý sharalarynyń tek sottyń sheshimimen júzege asyrylýy erekshe aıtýǵa turarlyq. «Osy jyly elimizde sot júıesiniń qyzmetin retteýge baǵyttalǵan kóptegen jańa zańdar qabyldandy. Jalpy sot júıesiniń jumysy birtindep jetilip keledi. 2002 jyly osy baǵytqa 4,8 mıllıard teńge bólinse, bıylǵy jyly bul kórsetkish 20,5 mıllıard teńgege jetti. Elimizde sot organdaryna arnap birqatar ǵımarattar salyndy. Olarda sot qyzmetine qajetti barlyq múmkindikter qarastyrylǵan.
Sońǵy jyldary elimizde sottar men sýdıalardyń qatary artyp keledi. 2002 jyly elimizde 185 jergilikti sottar, men 1 myń 823 sýdıalar bolsa, qazirgi tańda jergilikti sottardyń sany 340-ty, al sýdıalar 2 myń 433-ti qurady», dedi Memleket basshysy.
Sondaı-aq Elbasy óz sózinde sottarǵa degen qajettilik eldegi suranysqa áli de bolsa saı emestigin atap ótti. «Bul salada Qazaqstan áli de bolsa damyǵan memleketterdiń qataryna ilese almaýda. Sondyqtan biz sot qyzmetiniń jumysy talapqa saı bolýyn qamtamasyz etýimiz qajet. Odan keıingi máselelerdi taǵy qarastyra jatarmyz», dedi Prezıdent.
