Sot júıesiniń Keńes odaǵynan qalǵan bes satylyq úlgisinen damyǵan elderdegi sııaqty úsh satylyq júıege ótý qajet
Mamannyń aıtýynsha, aldaǵy ýaqytta sot júıesiniń Keńes odaǵynan qalǵan bes satylyq (birinshi, apellıatsııalyq, kassatsııalyq, qadaǵalaýshy jáne qaıtalama qadaǵalaýshy) júıesinen damyǵan elderdegi sııaqty úsh satylyq júıege ótý qajet.
«Bizge Keńes odaǵynan bes satylyq júıe «muraǵa» qaldy. Qazir sheteldikter ony túsinbeıdi. Olarda kassatsııa qadaǵalaýshy organnyń rólin atqarady. Olarda protsess halyqaralyq talaptarǵa saı júrgiziledi. Ondaı jaǵdaıda birinshi ınstantsııa soty, sosyn apellıatsııa (onyń mańyzy kúsheıtilip, olar máseleni alqa otyrysynda qarastyratyn bolady), úshinshi satyda kassatsııanyń jumysyn Joǵary sot oryndaıdy. Bul jerde Joǵary sot qyzmetkerleriniń sanyn kóbeıtý kerek, óıtkeni olarǵa túsetin aýyrtpalyq óte úlken bolady. Mine, osy jaǵdaıda halyqaralyq standarttarǵa birtaban jaqyndaımyz», - dep atap ótti maman.
Onyń aıtýynsha, Memleket basshysy N. Nazarbaevtyń zań ústemdigin qamtamasyz etý jolyndaǵy reformalary elimizdegi sot júıesin álemdik talaptarǵa jaqyndatady. «Memleket basshysy jarııalaǵan bes ınstıtýtsıonaldyq reformada eń birinshi orynǵa quqyqtyń ústemdigi, zańdylyq jáne sot júıesin reformalaý qoıylyp otyr. Mine, osy bes ınstıtýtsıonaldyq reforma elimizdiń quqyqtyq júıesin halyqaralyq talaptarǵa jaqyndatady. Endigi jerde Joǵary sot usynǵan, ulttyq komıssııa maquldaǵan barlyq sheshimder konstıtýtsııalyq quqyqty qorǵaýdy damytýǵa múmkindik beredi», - deıdi M. Báshimov.
