Sot júıesiniń bıýdjetin belgileý tártibi ózgeredi

NUR-SULTAN. QazAqparat – QR Parlamenti Májilisiniń jalpy otyrysynda «QR sot júıesi men sýdıalarynyń mártebesi týraly» Konstıtýtsııalyq zańǵa ózgerister men tolyqtyrýlar engizý týraly» Konstıtýtsııalyq zań jobasynyń qorytyndysy birinshi oqylymda talqylandy, dep habarlaıdy QazAqparat tilshisi.

Qujatty áriptesterine Májilis depýtaty Názılá Razzaq tanystyrdy.

«Zań jobasynyń basty maqsaty - sot júıesin odan ári damytý. Zańnamalyq ózgerister sýdıalardyń kásibıligin, sondaı-aq jaýapkershiligi men táýelsizdigin arttyrýdy kózdeıdi. Bul maqsatqa jetý jolynda basty 3 baǵytqa nazar aýdaryldy. Ol, eń aldymen, sot júıesin qarjylandyrýǵa baılanysty. Sottardyń qarjylyq derbestigi – sot bıligi táýelsizdiginiń negizgi kórsetkishteriniń biri. Sondyqtan halyqaralyq tájirıbe boıynsha sot júıesi bıýdjetiniń mólsherin paıyzben belgileý usynylady», - dedi depýtat.

Onyń aıtýynsha, bul - sot júıesi bıýdjetin qalyptastyrýdyń jańa modeli.

«Sot júıesine jumsalatyn shyǵystar «001» bıýdjettik baǵdarlamasy boıynsha barlyq memlekettik organdar shyǵystarynyń keminde 6,5 paıyzyn quraıdy.

Qarjylandyrý deńgeıleri men baǵyttaryn Joǵarǵy sottyń keńeıtilgen keńesiniń jalpy otyrysy bóledi. Oǵan aýdandyq, oblystyq jáne Joǵarǵy sottyń sýdıalary kiredi. Esep komıtetiniń baqylaýy saqtalady», - dedi Názılá Razzaq.