Sot júıesine ІT-tehnologııalar belsendi túrde engizilýde

ASTANA. QazAqparat - Astana qalasynyń Esil aýdandyq sotynda sot tóraǵasynyń jáne sýdıalarynyń, aýdan ákimdigi men prokýratýrasy ókilderiniń qatysýymen «Sot júıesine ІT tehnologııalardy engizý» taqyrybynda «dóńgelek ústel» ótti.

Kezdesý barysynda Esil aýdandyq sotynyń tóraǵasy Damır Ábdiǵalıev sot tóreligin júzege asyrý jumysyn ońtaılandyrýdyń basym baǵyttarynyń biri aqparattyq tehnologııalardy qoldaný arqyly sot isin júrgizýdiń aıqyndyǵyn barynsha arttyrý bolyp tabylatyndyǵyn atap ótti.

Sot júıesin ońtaılandyrý ári qoljetimdi etý - Qazaqstan Respýblıkasy Prezıdentiniń sýdıalardyń VI sezinde bergen tapsyrmalarynyń biri. Osy maqsatta sot isin júrgizýde ınnovatsııalyq tehnologııalardy keńinen qoldanyp, Qazaqstan Respýblıkasynyń sot júıesinde jańartylǵan ınternet-resýrstar, sot protsesine qatysýshylarǵa SMS-habarlandyrýlar jiberý jáne elektrondyq poshta arqyly habarlandyrý, «Sot qujattarymen tanysý», «Tyńdalǵan ister tizimi», «Sot kabıneti», «Sotqa shaqyrý» servısteri sot organdarynyń Call-ortalyqtary iske qosyldy.

Esil aýdandyq soty tóraǵasynyń aıtýynsha, 2016 jyldyń 4 aıynda 2015 jyldyń 4 aıymen salystyrǵanda, «Sot kabıneti» arqyly joldanatyn aryzdardyń sany kóbeıgen. 2015 jyldyń qańtar-sáýir aılary aralyǵynda 2,7 % aryz túsken bolsa, al 2016 jyldyń 4 aıynda 87 % aryz elektrondy túrde túsken.

Dóńgelek ústel sońynda sharaǵa qatysýshylar osy baǵyttaǵy jumystardy odan ári jetildirý boıynsha tujyrymdar men usynymdar ázirledi.