Sot júıesin jańǵyrtýdyń tyń tásilderi taıaýda belgili bolady
NUR-SULTAN. QazAqparat – Sot júıesin jańǵyrtýdyń tyń tásilderi taıaýda belgili bolady. Bul týraly Prezıdent janyndaǵy Sheteldik ınvestorlar keńesiniń 34-shi jalpy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Investıtsııalyq ahýaldy jaqsartý jónindegi júıeli jumystar Qazaqstandy barynsha qýatty elge aınaldyrýǵa baǵyttalǵan iri, aýqymdy reformalarmen birge júredi. Ádil básekeni damytý, jemqorlyqty joıý, tıimdi memlekettik basqarý jáne adamı kapıtal sapasyn jaqsartý - maqsattarymyzǵa qol jetkizýdiń mindetti bóligi sanalady», - dedi Memleket basshysy.
Prezıdent kóptegen ınvestorlardy elimizdiń sot júıesindegi beıtaraptyq pen ádildiktiń joqtyǵy alańdatatyndyǵyn da jasyrmady.
«Qazirdiń ózinde júıeni reformalaýǵa baǵyttalǵan úlken qadam jasalyp, ózge salalardaǵy bedeldi zańgerlerdi tartý arqyly zańnamany jaqsartý jumysy únemi júrgiziledi. AHQO óte mańyzdy ról atqarady, Halyqaralyq arbıtraj ortalyǵy ınvestıtsııalyq daýlardy sheshý úshin jumys isteıdi. Degenmen, qol jetkizgen jetistikpen toqtap qalmaımyz. Meniń tapsyrmammen Reformalar jónindegi joǵarǵy keńes sot júıesin odan ary jańǵyrtý baǵytynda jumys istep jatyr. Bul saladaǵy jańa tásilder taıaý arada belgili bolady», - dedi Qasym-Jomart Toqaev.
