Sot júıesin reformalaýdyń jańa tásilderi sýdıalardyń táýelsizdigin odan ári nyǵaıtýǵa tıis - Prezıdent
NUR-SULTAN. QazAqparat - Reformalar qoǵamnyń sottarǵa senimin kúsheıtýi, sotqa jańa kásibı mamandardy tartýǵa yntalandyrýy, sot protsesteriniń tıimdiligi men qolaılylyǵyn arttyrýy qajet. Bul týraly QR Prezıdenti Qasym-Jomart Toqaev Reformalar jónindegi joǵarǵy keńestiń besinshi otyrysynda aıtty, dep habarlaıdy QazAqparat.
Prezıdent quqyqtyq reformalar týraly aıta kelip, ádil sot tóreligin qamtamasyz etý maqsatynda sot júıesin birtindep jáne júıeli jańǵyrtýdyń mańyzdylyǵyn atap ótti.
«Bul quqyqtyq memlekettiń asa mańyzdy kórsetkishi, ınvestıtsııalyq tartymdylyqtyń, jeke menshik quqyǵyn qorǵaýdy qamtamasyz etýdiń negizi. Sot júıesin reformalaýdyń jańa tásilderi sýdıalardyń táýelsizdigin odan ári nyǵaıtýǵa tıis. Reformalar qoǵamnyń sottarǵa senimin kúsheıtýi, sotqa jańa kásibı mamandardy tartýǵa yntalandyrýy, sot protsesteriniń tıimdiligi men qolaılylyǵyn arttyrýy qajet», – dedi Prezıdent.
Memleket basshysy ázirlengen tetikter sot salasyna quqyqtyń jekelegen baǵyttary boıynsha myqty zańgerler men mamandardy tartýǵa múmkindik beretinin aıtty.
Qasym-Jomart Toqaev bul másele Parlamentte azamattyq qoǵam ókilderi men zańgerlerdiń qatysýymen ashyq ári jan-jaqty talqylanýy kerek dep sanaıdy. Ol tıisti zań jobasyn bıyl qabyldaýdy tapsyrdy.
«Bul reforma óte mańyzdy. Ol Qazaqstannyń zamanaýı jáne tıimdi memleketke transformatsııalanýyna baǵyttalǵan jumystardyń basyn biriktiredi», – dedi Prezıdent.
