Sot júıesi men sýdıalardyń mártebesi týraly zańǵa engizilgen ózgerister maquldandy - Májilis
ASTANA. 15 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń cot júıesi men sýdıalardyń mártebesi týraly QR Konstıtýtsııalyq Zańyna ózgerister men tolyqtyrýlar engizý týraly» zań jobasyn talqylady.
Toqtala ketetin jaıt, buǵan deıin Májilis maquldaǵan atalǵan zań jobasyna Parlament Senaty birqatar ózgerister engizip, qujatty keri qaıtarǵan bolaty. Májilis osy ózgeristerdi qarap, kelisimin berdi.
Atalǵan joba elimizdiń sot júıesin jetildirý maqsatynda ázirlengen jáne QR Prezıdentiniń quqyq qorǵaý qyzmeti men sot júıesiniń tıimdiligin arttyrý týraly Jarlyǵyn júzege asyrýǵa baǵyttalady. Toqtala ketetin jaıt, eldegi reformaǵa sáıkes QR Joǵarǵy sotynyń janyndaǵy Sot ákimshiligi jónindegi komıtet taratylatyny belgili. Osyǵan oraı zań jobasynda sot qyzmetin uıymdastyrýshylyq, materıaldyq-tehnıkalyq qamtamasyz etý normalary qamtylyp otyr. Sondaı-aq zań jobasymen Joǵarǵy sottyń tóraǵasyna, aýdandyq jáne oblystyq sottardy qurý, qaıta uıymdastyrý jáne taratý týraly usynystardy QR Prezıdentine usyný jónindegi ókilettik beriledi. Qujat boıynsha sýdıanyń ornynan túsý nysanynda qyzmetinen bosatý úshin qosymsha talaptar kózdeledi jáne sýdıanyń ornynan túsýin toqtata turý ınstıtýty engiziledi.
Senatorlar Májilis maquldaǵan zań jobasyna birqatar túzetýler usynǵan bolatyn. Atap aıtsaq, zań jobasynda Joǵarǵy sottyń jalpy otyrysynyń ókilettikteri kózdeletin arnaıy norma bekitilgen. Senat atalǵan normaǵa zańdylyqty udaıy buzýǵa jol bergen sýdıaǵa qatysty talqylaýdy kózdeıtin túzetýler engizdi. Bul norma sybaılas jemqorlyq kórinisterin boldyrmaý, sondaı-aq sot tóreligin iske asyrý kezindegi sýdıanyń táýelsizdigi prıntsıpteri saqtalýyn qamtamasyz etý maqsatynda jasalǵan edi. Budan bólek, senatorlar jasaǵan túzetýge sáıkes sot isterin qaraý kezinde zańdylyqty buzýǵa jol bergen materıaldardy Sot jıýrıine berý týraly norma qamtylyp otyr. Májilis bundaı usynystardy tolyǵymen qoldap otyr.
