Sot «Jezqazǵan Energosbyt» kompanııasyna tutynýshylarǵa 1 mlrd teńge qaıtarýǵa mindettedi
ASTANA. QazAqparat - Qaraǵandy oblysynyń mamandandyrylǵan aýdanaralyq ekonomıkalyq soty monopolııaǵa qarsy vedomstvonyń «Jezqazǵan Energosbyt» JShS-ne jiberilgen talabyn qarastyrdy.
Jezqazǵan aımaǵy men kóptegen aýyldyq aýdandardy elektr qýatymen qamtamasyz etip otyrǵan monopolıst tarıf jónindegi iste jeńildi, dep habarlaıdy oblys ákiminińresmı saıty .
Sot kóterińki tarıfterdi zańsyz dep taýyp, kásiporyndy bir aı aralyǵynda tutynýshylarǵa 1 mlrd teńgeni qaıtaryp berýge mindettedi.
Talapker retinde QR Qazaqstan Respýblıkasy Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti shyqty. Onyń talabyn sot tolyqtaı qanaǵattandyrdy.
«Jezqazǵan Energosbyt» JShS sot sheshimi zańdyq kúshinen engen soń 30 kún aralyǵynda tutynýshylarǵa 1 014 879 300 teńgeni qaıtaryp berýge mindetteldi. «Jezqazǵan Energosbyt» JShS 2015-shi jyldyń qańtar aıynan bastap, quzyrly organ bekitken jańa baǵaǵa deıingi merzimde 1kVt/saǵat qosymsha qun salyǵysyz 15 teńge tarıf qunyn, tutynýshylar toptary boıynsha dıfferentsıatsııalaý: halyqqa - 1kVt/saǵat qosymsha qun salyǵysyz 13 teńge; basqalaryna - 1kVt/saǵat qosymsha qun salyǵysyz 18,41 teńgeni qoldanýdy mindettedi», - dep ekonomıkalyq sottyń sýdıasy Dııaz Mustafınniń jarııalaǵan sheshimniń rezolıýtsııalyq bóliginde aıtylǵan.
Oǵan qosa, sot monopolısten memlekettik bıýdjet kirisine 30 mln teńge kóleminde memlekettik baj óndirdi.
Sonymen qatar sot monopolııaǵa qarsy organnyń dáleldi qorytyndy shyǵarý áreketin zańsyz dep taýyp, oryn alǵan ereje buzýshylyqty joıýǵa sheshim zań júzine engennen soń bir aı kóleminde joıýdy mindettedi.
Sot sheshimi zań kúshine engen joq - eki jaqta da ony appelıatsııalyq ınstantsııaǵa shaǵymdaný quqyǵy bar.
«Jezqazǵan Energosbyt» tóńiregindegi tarıfke qatysty daý-damaı uzaq ýaqyt jalǵasyp keledi. 2015-shi jyldyń 1 qańtarynan bastap qyzmet kórsetýshi halyqqa qosymsha qun salyǵysyz 1kVt/saǵatyna 18,83 teńge kóleminde shot jibere bastaǵan. Ol baǵa monopolııaǵa qarsy organmen maquldanbaǵan.
