Sot jeke medıtsınalyq uıymdarǵa qoıylǵan shekteýdi zańsyz dep tanydy
ASTANA. KAZINFORM — Qazaqstan Respýblıkasy Básekelestikti qorǵaý jáne damytý agenttiginiń Atyraý oblysy boıynsha departamenti Atyraý oblysy Densaýlyq saqtaý basqarmasy tarapynan jeke medıtsınalyq uıymdardyń qyzmetin shekteý faktileri boıynsha monopolııaǵa qarsy zańnama buzýshylyqtaryn anyqtady.
Tergep-tekserý barysynda Basqarmanyń memlekettik medıtsınalyq uıymdarǵa gıstologııalyq zertteýlerdi tek memlekettik mekemelerge ǵana joldaý týraly mindetti nusqaý bergeni belgili boldy. Atalǵan talap jeke klınıkalardyń tıisti qyzmetterdi kórsetýine qoljetimdi bolmaı, patologııalyq anatomııa naryǵynda kedergiler qalyptastyrǵan.
— Departament qorytyndylarynyń zańdylyǵyn Atyraý oblystyq sotynyń ákimshilik ister jónindegi sot alqasy rastady. Sot qoldanystaǵy zańnamada jeke uıymdardyń patologııalyq anatomııa salasynda qyzmet kórsetýine tyıym salynbaǵanyn atap ótti. Osyǵan baılanysty, Basqarmanyń áreketteri básekelestikke qarsy dep tanylyp, Departament bergen nusqama zańdy jáne negizdi dep tanyldy, — delingen habarlamada.
Sot sheshimi zańdy kúshine engennen keıin zańsyz tapsyrma joıylyp, Departament nusqamasy tolyq kólemde oryndaldy. Basqarmanyń laýazymdy tulǵasy ákimshilik jaýapkershilikke tartylyp, aıyppul salyndy.
Nátıjesinde gıstologııalyq zertteýler júrgizý qyzmetterin tegin medıtsınalyq kómektiń kepildendirilgen kólemi (TMKKK) jáne mindetti áleýmettik medıtsınalyq saqtandyrý (MÁMS) júıesi aıasynda kórsetetin jeke medıtsınalyq uıymdarǵa qoıylǵan shekteýler alynyp tastaldy.
Aıta keteıik, buǵan deıin Básekelestikti qorǵaý jáne damytý agenttiginiń aralasýymen Qostanaıda kommýnaldyq tólemderge qoıylǵan shekteýler alynyp tastalǵan edi.
