Sot janyndaǵy otbasyn qoldaý ortalyqtaryna 3 myńǵa jýyq adam júgingen
NUR-SULTAN. QazAqparat - Búgin Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy ótti, dep habarlaıdy QazAqparat.
Otyrysty onlaın-rejımde ashqan Ulttyq komıssııanyń tóraıymy Lázzat Ramazanova Memleket basshysy Qasym-Jomart Toqaevtyń qoıǵan mańyzdy mindetterdi oryndaý úshin memlekettik organdardyń jaýapkershiligin arttyrý qajettigin atap ótti.
«Ulttyq komıssııa otbasy men balalardyń múddesin qorǵaýǵa qatysty ózekti máselelerdi talqylaý boıynsha qoǵamdyq dıalogty damytýdy jalǵastyrýda. «Otbasylyq-turmystyq zorlyq-zombylyqqa qarsy is-qımyl týraly» zań jobasy ázirlendi. Búgingi tańda quqyq qorǵaýshy ÚEU belsendi qatysýymen 13 onlaın-talqylaý ótkizildi», - dedi L.Ramazanova.
Otyrysta Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasyn iske asyrý jónindegi is-sharalar josparynyń birinshi kezeńiniń oryndalý qorytyndysy baıandaldy.
Otbasy ınstıtýtyn nyǵaıtýǵa, otbasylyq qundylyqtardy ilgeriletýge baǵyttalǵan birqatar áleýmettik-mańyzdy jobalar iske asyryldy. Joǵarǵy Sottyń qoldaýymen «Baqytty otbasy» otbasylyq sottar janyndaǵy otbasyn resýrstyq qoldaýdyń 12 ortalyǵynyń qyzmeti qamtamasyz etildi (Nur-Sultan, Almaty qalalarynda, Qaraǵandy, Aqmola, Atyraý, Jambyl, Qostanaı jáne Shyǵys Qazaqstan oblystarynda).
Esepti kezeńde ortalyqtarǵa 2 750-den astam adam ótinish jasady, onyń ishinde ajyrasý máseleleri boıynsha – 2030 adam. Tatýlasýǵa daıyn adam sany 38,1% (774 adam) qurady.
«ÓNEGE» jobasy sheńberinde 9 óńirde áleýmettik qyzmetter 1125 konsýltatsııalyq qyzmet kórsetti jáne otbasyndaǵy ómirlik qıyn jaǵdaıdyń 225 oqıǵasy boıynsha kómek berdi.
19 myń adam tegin keńes aldy, onyń ishinde 350-i qıyn jaǵdaıǵa tap bolǵan.
«Rýhanı jańǵyrý» qazaqstandyq qoǵamdyq damý ınstıtýtynyń qurylymynda otbasy ınstıtýtyn zertteý ortalyǵy ashyldy. Bıyl ortalyq otbasynyń ózekti máseleleri boıynsha birqatar zertteýler júrgizedi.
2019 jyly Nur-Sultan qalasynda «Januıa» ortalyǵy ashyldy, ol «bir tereze» qaǵıdaty boıynsha qala turǵyndaryna kórsetiletin memlekettik qyzmetterdi biriktiredi jáne otbasylarmen jeke jumys júrgizedi.
Búgingi kúni ortalyqqa 14,8 myń suraqpen 7 myńǵa jýyq adam júgindi. 11,5 myńnan astam keńes berilip, onyń barysynda 3,5 myńnan astam másele sheshildi.
Talqylaý barysynda Qazaqstandaǵy otbasylyq jáne genderlik saıasat salasyndaǵy nysanaly ındıkatorlarǵa qol jetkizýge baılanysty birqatar máseleler atap ótildi.
Otyrysqa qatysýshylarǵa ıÝNFPA-nyń Qazaqstandaǵy ókildigi ótkizgen «urpaq jáne gender» zertteý qorytyndylary usynyldy.
Sońynda Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń 20 jyldyǵyna arnalǵan kitap tanystyryldy.
Otyrys qorytyndysy boıynsha tıisti mınıstrlikter men jergilikti atqarýshy organdarǵa naqty tapsyrmalar berildi.
