Sot jáne quqyq qorǵaý júıesindegi reformalar jalǵasady – Prezıdent

ASTANA. QazAqparat – Prezıdent retinde bızneske memleket tarapynan qoldaý kórsetiletinine kepildik beremin. Bul týraly VIII saılanǵan QR Parlamentiniń birinshi sessııasynyń otyrysynda Memleket basshysy Qasym-Jomart Toqaev málim etti, dep habarlaıdy QazAqparat tilshisi.

«Eldi jaılaǵan indet jáne onyń saldary kásipkerlerge ońaı tımegeni anyq. Byltyrdan beri saıası júıeni jańǵyrtýǵa basa mán berdik. Endi ekonomıkadaǵy naqty máselelermen aınalysatyn kez keldi. Bul jumysty myqtap qolǵa alý kerek. Bizdiń basty mindetimizdiń biri – jeke menshikti qorǵaý jáne naryqtyń básekeli bolýyn qamtamasyz etý. Sol úshin sot jáne quqyq qorǵaý júıesindegi reformalardy jalǵastyrý qajet», - dedi Qasym-Jomart Toqaev.

Osy oraıda oraıda Prezıdent elimizdiń kásipkerlerine úndeý jasady.

«Qazaqstan – bárimizdiń ortaq mekenimiz. Endeshe, qasterli Otanymyzdy birge órkendeteıik, bolashaǵymyzdy birge quraıyq. Men Prezıdent retinde Sizderge memleket tarapynan qoldaý kórsetiletinine kepildik beremin. Biz shaǵyn jáne orta bıznestiń básekege qabiletin arttyrý máselesine basa mán beremiz. Osy oraıda, shaǵyn jáne orta bızneske qoldaý kórsetýdiń biryńǵaı keshendi baǵdarlamasyn ázirleý qajet», - dedi Memleket basshysy.