Sot Janabylovtardyń isin prokýratýraǵa qaıtarýdan bas tartty

ASTANA. KAZINFORM — Aldyn ala sot tyńdalymynda Janabylovtardyń advokaty Gaýhar Aıtjanova isti prokýratýraǵa qaıtarýdy surady. Ol sotqa deıingi tekserý tolyq júrgizilmegenin, keıbir mańyzdy dálelder jınaqtalmaǵanyn aıtyp, qosymsha tekserý qajet ekenin jetkizdi.

Advokattyń aıtýynsha, Elmıra Tólegenova — «Jańabıznes» JShS-niń jalǵyz quryltaıshysy. Kompanııa arqyly satylǵan kýrstardyń aqshasy resmı esepshotqa túsken jáne osy kezeńde salyq retinde 10 mıllıon teńgeden astam tólengen. Kýrsty satyp alǵandarǵa berilgen 30 myń teńgelik syılyqtar tek satýdy yntalandyrýǵa arnalǵan jáne zańsyz kásipkerlikke qatysy joq.

Alaıda memlekettik aıyptaýshy Karına Amanjolova is materıaldarynda jetkilikti dálelder bar ekenin aıtty. Onyń pikirinshe, Janabylovtardyń áreketteri Qylmystyq kodekstiń 214 jáne 218-baptaryna sáıkes quqyqbuzýshylyq belgilerin kórsetedi. Saraptama qorytyndylary, qarjylyq qujattar men tergeý áreketteriniń nátıjeleri isti sotta tolyq qaraýǵa negiz beredi.

Sot sýdıasy Ádilbek Baımahanov advokattyń ótinishin qanaǵattandyrmady. Negizgi sot tyńdalymy 16 naýryz kúni saǵat 11:00–de ashyq túrde ótedi. Aıyptalýshylarǵa taǵaıyndalǵan úıqamaq ózgerissiz qaldy.

Sot qylmys bar-joǵyn tek barlyq dálelderdi zerttep, aıyptalýshylar men kýálardy tyńdaǵannan keıin ǵana sheshetinin atap ótti. Eske sala ketsek, 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovaǵa qatysty qylmystyq is qozǵaldy.

Sonymen qatar mınıstr jelide avtokólikterdi utysqa tikken blogerlerge qatysty túsinik bergen edi.