Sot J.Dosqalıevtiń múlkin tárkilep, qatań rejimdegi kolonııaǵa 7 jyl bas bostandyǵynan aıyrýǵa úkim shyǵardy
ASTANA. 5 tamyz. QazAqparat - Burynǵy Densaýlyq saqtaý mınıstri Jaqsylyq Dosqalıev múlkin tárkilep, qatań rejimdegi kolonııaǵa 7 jyl bas bostandyǵynan aıyrý jazasyna kesildi.
Sot Jaqsylyq Dosqalıevti QR QK 5-bólimi 311-babynda (asa iri kólemde para alý) kózdelgen qylmystardy jasaǵany úshin kináli dep tanyp, QR QK 55 babyn qoldana otyryp, múlkin tárkilep, qatań rejimdegi túzeý kolonııasyna 7 jyl bas bostandyǵynan aıyrý jazasyn kesti.
Sonymen qatar sot J.Dosqalıevti QR QK 1-bólimi 377-baby (laýazymyn asyra paıdalaný) boıynsha da kináli dep tanydy. Degenmen QR QK 69 baby boıynsha merziminiń ótip ketýine baılanysty qylmystyq jaýapkershilikten bosatty.
«J.Dosqalıevke qatysty úıqamaq sharasy tutqyndaý sharasymen ózgertilip, sot zalynda tutqyndalsyn. Dosqalıevtiń 27 470 854 teńge, 449 358 AQSh dollary jáne 2 005 eýro kólemindegi aqshalaı qarajaty, Astana qalasynyń «Qaraótkel» shaǵyn aýdanyndaǵy jer telimi, Astananyń Máskeý kóshesi boıyndaǵy úıdegi № 34,46,82 páterleri memleket kirisine tárkilensin», - dedi Meıram Janǵutdınov.
Sýdıanyń atap ótýinshe, J.Dosqalıevke jaza taǵaıyndaý kezinde sotta onyń jasynyń ulǵaıýy, alǵash reti sottalyp otyrǵandyǵy, oń minezdemesi jáne otbasylyq quramy eskerilgen.
Buǵan deıin habarlanǵandaı, burynǵy Densaýlyq saqtaý mınıstri Jaqsylyq Dosqalıev ózine kesilgen úkimge baılanysty joǵary ınstantsııaǵa shaǵymdanbaq.
