Sot zalynda áıelin pyshaqtaǵan Qostanaı oblysynyń turǵyny 15 jylǵa sottaldy
QOSTANAI. QazAqparat - Qostanaı oblysynda sot zalynda áıelin pyshaqtaǵan 32 jastaǵy Jumatuly Bekibaevqa qatysty sot úkimi shyqty, dep habarlaıdy QazAqparat oblystyq sottyń baspasóz qyzmetine silteme jasap.
Eske salaıyq, 28 aqpan kúni saǵat 10.00-de Amangeldi aýdandyq sotynda sot otyrysy bastalǵanǵa deıin azamat N.J.Bekibaev óziniń jubaıy J.A.Taýbaevamen sózge kelip, kútpegen jerden aıaq kıiminiń ishinen pyshaq alyp shyǵyp, oǵan birneshe ret suǵyp alǵan bolatyn. Jedel járdem shaqyrylǵanymen J.Taýbaeva aýyr jaraqattan sol jerde qaza tapty.
Sottyń úkimimen Bekibaev 15 jylǵa bas bostandyǵynan aıyryldy. Budan bólek, sot oǵan zardap shegýshi otbasyǵa 1 mln 100 myń teńge kóleminde materıaldyq zalal jáne 2 mln teńge somasynda moraldyq zalal tóleýge mindettedi.
Sonymen qatar, sot oblystyq bilim berý basqarmasyna buryn sottalǵan adamdy jumysqa qabyldaǵany úshin jeke úkim shyǵardy. Bul oqıǵaǵa deıin Bekibaev isti bolsa da, aýyl mektebinde dene shynyqtyrý pániniń muǵalimi bolyp jumys istegen.
Olardyń kámeletke tolmaǵan uly zardap shegýshiniń ata-anasynyń qamqorlyǵyna berildi. Úkim zańdy kúshine engen joq.
