Sot zalynan: Aqtóbede munaı urlaǵan qylmystyq toptyń arasynda túrmede otyrǵandar da bar
AQTÓBE. QazAqparat - Aqtóbede munaı urlady degen kúdikke ilikken qylmystyq topqa qatysty aldyn ala sot tyńdaýy boldy, dep habarlaıdy QazAqparat tilshisi.
Sot otyrysyna qatysty Aqtóbedegi Shámshi Qaldaıaqov kóshesi jabyldy. Aqtóbe oblystyq qylmystyq ister jónindegi mamandandyrylǵan aýdanaralyq sotynyń ǵımaraty tańerteń qorshaýǵa alynyp, polıtsııa tártipti baqylady. Aldyn ala tyńdaý kezinde sottalýshylardyń aty-jónderi, otbasy, turǵylyqty jeri anyqtaldy. máselen, sottalýshy Erkin Іzbasardyń úsh balasy bar, Aqtóbe qalasynda turady, eki joǵary oqý ornyn bitirgen. Ol ótken jyldyń 7 qarashasy kúni ustaldy.
«Men aýyryp otyrmyn, jaýap bere almaımyn suraqtarǵa»,- dedi sottalýshy Erkin Іzbasar. Sottalýshylardyń týǵan-týystary sot otyrysyn ekrannan kórdi.
Eske salsaq, Qylmystyq kodekstiń «Munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý», «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý» baptary boıynsha aıyp taǵyldy .
Sottalýshylar arasynda buryn usaq urlyq jasaǵandar bar. Al sottalýshy Birjan Amanqulov túrmede otyrǵan jerinen qylmystyq jaýapkershilikke tartylyp jatyr. Sottalýshylar: Adaıbek Sársenov, Nurbolat Qaıyrbaev, Aıbek Tileýǵazıev, Aýhat Qalıev, Muhanbet Shavletov, Erkin Іzbasar, Bolatbek Beketov, Jandos Aqmaǵambetov, Jangeldi Ótegenov, Rýslan Dermuhanov, Amandos Esenǵalıev, Bekjan Qultaev, Nurlan Noǵaev, Saıasat Dúsipov, Súleımen Súgirbaev, Murat Turjanov, Sergeı Savchenko, Birjan Amanqulov, Erbol Tektiǵulov, Qaıyrkeldi Іzturǵanov, Nurlybek Tontaev, Janat Tektiǵulov, Kádirjan Pangereıuly, Murat Qýanyshev, Rahat Ahanov, Qartjan Qaldymurat.
Aıta keteıik, sottalýshylardyń aldy 2016 jyldyń qarasha aıynda ustalsa, keıbireýi osy jyldyń maýsym aıynda kúdikke ilikken. Aldyn ala sot tyńdaýy kezinde anyqtalǵany, buryn Aqtóbe oblystyq Іshki ister departamenti bastyǵynyń orynbasary bolǵan Rahat Ahanovtyń úsh balasy bar. Ol ótken jyldyń 18 qańtarynda ustaldy. Astana qalasynda turatyn polıtsııa qyzmetkeri kúni búginge deıin ýaqytsha tergeý ızolıatorynda qamaýda otyrdy.
