Sot zalyna ınternetke qosylatyn symsyz quraldardy alyp kirýge ruqsat etilýi múmkin

ASTANA. QazAqparat - QR Joǵarǵy soty sottarǵa kirý jóninde jańa qaǵıdalardyń jobasy ázirlendigin habarlady. Bul týraly QazAqparat QR Joǵarǵy sotynyń baspasóz qyzmetine silteme jasap habarlaıdy. 

Baspasóz málimetterine qaraǵanda, Qazaqstan Respýblıkasy Joǵarǵy Sotynyń janyndaǵy Sottardyń qyzmetin qamtamasyz etý departamenti qazirgi ýaqytta QR Joǵarǵy sotynyń, QR jergilikti sottarynyń, QR Joǵarǵy Sotynyń janyndaǵy Sottardyń qyzmetin qamtamasyz etý departamentiniń (Qazaqstan Respýblıkasy Joǵarǵy Sotynyń apparatynyń) jáne onyń aýmaqtyq organdarynyń aýmaǵyna jáne ǵımarattaryna kelýshiler úshin ótkizý jáne obektishilik rejımderdi qamtamasyz etý jóninde jańa qaǵıdalardyń (budan ári - Qaǵıdalar) jobasyn ázirleý jumysyn júrgizýde.

Qaǵıdalar jobasy Joǵarǵy Sotqa kelip túsken advokattar qoǵamdastyǵynyń jáne sot protsesine basqa da qatysýshylardyń kózqarastary eskerile otyryp jasalǵan.

Qaǵıdalardyń jańa tarmaqtarynyń birinde sottardyń ǵımarattaryna keletin sot protsesterine qatysýshylarǵa jazba qurylǵylardy, esepteý tehnıkasyn, mobıldi qurylǵylardy (smartfondar, planshetter jáne t.b.), aqparat jetkizgishterdi (flesh-kartalar, USB-dıskiler jáne t.b.) jáne basqa da tehnıkalyq quraldardy, onyń ishinde derekterdi berý, sondaı-aq halyqaralyq jahandyq jelige jáne Internet jelisine shyǵý múmkindikteri bar symsyz quraldardy kirgizýge ruqsat berý usynylǵan.

Osy jańashyldyqtar «Tsıfrlyq Qazaqstan» memlekettik baǵdarlamasyn iske asyrý, sonymen qatar sottardaǵy «elektrondyq sot tóreligi» servısterin odan ári damytý men jetildirý sheńberinde júzege asyrylýda.

Jańa qaǵıdalardyń jobasymen myna jerde tanysýǵa jáne oǵan ózderińizdiń usynystaryńyz ben pikirlerińizdi qaldyrýǵa bolady.