Sot zalynan aıyptalýshylardyń vıdeosy tarap ketti: tekseris júrip jatyr
ALMATY. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty kezekti sot otyrysy ótip jatyr.
Aıyptalýshy taraptyń týystary sot zalynan sottalýshylardyń vıdeosy áleýmettik jelide tarap jatqanyn aıtyp, shaǵymdandy. Onyń ishinde kámeletke tolmaǵan bala da bar ekenin jetkizdi.
— Bul boıynsha sot tekserý júrgizilip jatyr. Onyń nátıjesi qosymsha habarlanatyn bolady, — dedi sýdıa Erjan Januzaqov.
Aıta keteıik, aıyptalýshylar oryndyǵynda toǵyz adam bar, olardyń biri kámeletke tolmaǵan.
Buryn sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi.
Sonymen qatar oqıǵa ornyna alǵash barǵan polıtseıler kýálik berdi.
Oǵan deıin sot otyrysynda kýáger Elmıra Nurbekova jaýap berdi.
Ekinshi kýáger qyz Dana Jaqsygeldi oqıǵa týraly baıandady.
Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.
Eske salaıyq, prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.