Sot vaıner Meıirjan Tórebaevtyń merziminen buryn bosap shyǵý týraly ótinishin qanaǵattandyrmady

ALMATY. KAZINFORM – Túrksib aýdandyq sotynda Mudarabah Capital qarjy pıramıdasyn qurý isi boıynsha bes jylǵa sottalǵan belgili vaınerler Meıirjan Tórebaev pen Meıirhan Shernııazov merziminen buryn bosatý týraly ótinishi qaraldy.

Túrksib aýdandyq soty M.Tórebaevtyń QR QK 73-babynda kózdelgen jazanyń ótelmegen bóligin neǵurlym jeńilirek jazamen aýystyrý týraly ótinishin qarady.

— Sot talqylaýy barysynda sottalǵandarǵa jazany neǵurlym jeńil jazamen aýystyrý týraly ótinish hatty qanaǵattandyrýdyń negizgi krıterııleriniń biri — zııannyń ótelmegeni anyqtaldy, –dep habarlady qalalyq sottan.

QK-niń 73-babynyń 1-bóligine sáıkes, onsha aýyr emes, aýyrlyǵy ortasha nemese aýyr qylmys úshin bas bostandyǵynan aıyrýdy ótep jatqan adamǵa, ol qylmyspen keltirilgen zalaldy tolyq ótegen ne jazany óteýdiń belgilengen tártibin qas kóılikpen buzbaǵan jaǵdaıda, sot jazanyń qalǵan ótelmegen bóligin neǵurlym jeńil jaza túrimen aýystyrýy múmkin.

— Barlyq mán-jaılardy eskere otyryp, sot M.Tórebaevtyń jeke isiniń materıaldaryn jan-jaqty zerttep, sot qaýlysymen ótinish hatty qanaǵattandyrýsyz qaldyrdy, — dep atap ótti vedomstvodan.

Qaýly zańdy kúshine engen joq.

Osyǵan deıin, vaınerler sotqa merziminen buryn bosatý týraly ótinishpen júgingen edi. 

Buǵan deıin Pavlodar oblysynyń № 44 mekemesinde jazasyn ótep jatqan, Meıirjan Tórebaev pen Meıirhan Shernııazovtyń Almatydaǵy kolonııaǵa aýystyrylǵany týraly jazǵan edik. 

Eske salaıyq, byltyr maýsym aıynda Almatyda Mudarabah Capital qarjy pıramıdasyn qurý isi boıynsha sot úkimi shyqqan bolatyn. Atalǵan is boıynsha vaınerler Meıirjan Tórebaev pen Meıirhan Shernııazov 5 jylǵa sottaldy. 

Sondaı-aq, qarjy pıramıdasyn qurdy dep sottalǵan Meıirjan Tórebaevtyń áıeli Dana Eseeva áleýmettik jelide kúıeýi men balalarynyń vıdeosyn jarııalaǵanyn jazǵanbyz. 

Keıin Pavlodar oblysy qylmystyq-atqarý júıesi departamenti sottalýshy Meıirjan Tórebaevtyń nege úıine jiberilgenin túsindirdi. 

Osy jyldyń basynda vaınerler Meıirjan Tórebaev pen Meıirhan Shernııazov sotqa apelıatsııalyq shaǵym túsirdi. 

Alaıda apellıatsııalyq sot vaınerlerge qatysty úkimdi ózgerissiz qaldyrdy.