Sot «Valıýt-Tranzıt Banktiń» sottalǵan burynǵy basshysyn shartty túrde merziminen buryn bostandyqqa jiberý týraly ótinishti qaraýy kerek edi
QARAǴANDY. 11 aqpan. QazAqparat - Qaraǵandy oblysynyń Abaı aýdandyq sotyna ótken aptanyń aıaǵynda «Valıýt-Tranzıt Bank» AQ basqarmasynyń sottalǵan burynǵy tóraǵasy Aıtbaqy Bilálovty (Andreı Belıaev esimimen belgili) shartty túrde merziminen buryn bostandyqqa jiberý týraly ótinish kelip tústi,
dep habarlady aýdandyq sottyń baspasóz qyzmetinen.
«Juma, 8 aqpan kúni sottalǵan A.Bilálovtyń atynan shartty túrde merziminen erte bostandyqqa jiberý týraly ótinish kelip tústi. Qazirgi ýaqytta sottalǵannyń ólimine baılanysty materıaldardy ol jazasyn ótegen abaqtynyń basshylyǵy qaıtaryp aldy», - dedi Abaı aýdandyq sotynyń baspasóz qyzmetinen.
Budan basqa, búgin joıylǵan «Valıýt-Tranzıt Banki» salymshylarynyń taratý komıssııasynyń basshylyǵymen kezdesýi bolyp ótti.
«Valıýt-Tranzıt Bank» AQ taratý komıssııasynyń tóraǵasy Jandos Amanbekovtyń habarlaýynsha, taratý komıssııasy A.Bilálovtyń týystaryna talaptar usyndy.
«Qazirgi ýaqytta Almaty qalasynyń Qarasaı aýdandyq sotynyń qaraýynda Álııa Álkeevaǵa (A.Bilálovtyń zaıyby) qatysty «VT Lombard» JShS-niń 1,7 mlrd. teńgeni quraıtyn úlesi úshin talap aryzy jatyr. Budan basqa, «VT Laııf» JShS-niń 69,4 mln. teńgeni quraıtyn qarapaıym baǵaly qaǵazdary boıynsha Nurzııa Bilálovaǵa (A.Bilálovtyń qyzy) talap aryz berildi.
Almatynyń Qarasaı aýdandyq soty taratý komıssııasynyń talaptaryn qanaǵattandyrýdan bas tartty jáne qazirgi kezde apellıatsııalyq shaǵym berildi», - dep atap ótti taratý komıssııasynyń tóraǵasy.
Budan basqa, taratý komıssııasy Nurzııanyń atyna resimdelgen «VT Polıs» JShS-niń 59 mln. teńge kólemindegi taratylýǵa jatatyn baǵaly qaǵazyn alýǵa árekettenýde.
«Bastapqy talapty qaıtarý túrindegi qaıtalanǵan shaǵym aryz daıyndalýda», - dedi J.Amanbekov.
Taratý komıssııasynyń málimetterinshe, 1 aqpandaǵy jaǵdaı boıynsha qorǵa 7 mlrd. 155 mln. teńge bólindi, bul jalpy qaryzdyń jartysynan sál kóbirek somasyn quraıdy.
Esterińizge sala keteıik, búgin túnde Qaraǵandy qalasyndaǵy oblystyq medıtsına ortalyǵynyń jansaqtaý bóliminde «Valıýt-Tranzıt-Bank» AQ basqarmasynyń burynǵy tóraǵasy, sottalýshy A. Bilálov kenetten kóz jumdy.
10 aqpan kúni keshqurym Qarabas kentinde ornalasqan jalpy rejımdegi túzeý mekemesinen ol «Ishemııalyq júrek aýrýy» dıagnozymen jedel-járdem kóligimen Qaraǵandy qalasyndaǵy oblystyq medıtsına ortalyǵyna jetkizildi.
Aldyn ala jasalǵan boljam boıynsha, ol «Mıokard talmasynan» qaıtys bolǵan.
Esterińizge sala keteıik, 2007 jyldyń naýryzynda sot 1958 jylǵy A. Bilálovti 10 jylǵa sottaǵan edi.
