Sot uıǵarymyn oryndamaǵan BQO bilim basqarmasynyń basshysy aıyppul tóledi
ORAL. KAZINFORM – Sot BQO-nyń bilim berý uıymdarynda mektep oqýshylaryn ystyq tamaqpen qamtamasyz etý qyzmetteri boıynsha memlekettik satyp alý salasyndaǵy daýlar kezinde ákimshilik rásimderdiń birizdiliginiń joq ekenin anyqtady.
BQO sotynyń baspasóz qyzmetinen málim etkenindeı, osylaısha, apellıatsııalyq satydaǵy sot alqasy tómengi satydaǵy sottyń áleýetti jetkizýshiniń talap-aryzyn qanaǵattandyrýdan bas tartý týraly sheshiminiń kúshin joıdy. Talap-aryzdy qanaǵattandyrý jáne konkýrs qorytyndylaryn qaıta qaraý týraly jańa sheshim shyǵaryldy.
Sot talqylaýy barysynda konkýrstyq komıssııanyń ártúrli bilim berý uıymdarynda uqsas konkýrstyq ótinimderge ball qoıý kezinde qarama-qaıshy sheshimder qabyldaǵany belgili boldy.
Oǵan qosa memlekettik satyp alýdy júzege asyrý qaǵıdalaryn ártúrli túsindirgen, konkýrs boıynsha qujattardyń tolyq toptamasy bolmaǵan. Sondaı-aq bilim berý uıymdarynyń ókili sottarda quqyqtyq ustanymdy tańdaýda ártúrli konkýrstar boıynsha iriktep jáne qarama-qarsy tásil qoldanǵan.
Іsti qaraý qorytyndysy boıynsha sot oblystyq bilim basqarmasynyń basshysynyń atyna memlekettik satyp alýlar boıynsha ákimshilik rásimderdiń birizdiligine taldaý júrgizý jáne kináli tulǵalardyń jaýapkershiligin qaraý týraly jeke uıǵarym shyǵardy.
Budan bólek, sot bilim basqarmasynyń múddesin bildirgen advokatqa protsessýaldyq quqyqtardy teris paıdalanǵany, ártúrli ister boıynsha qarama-qaıshy ustanym ustanǵany jáne sotty jańylystyrǵany úshin 10 AEK kóleminde (39 320 teńge) aqshalaı óndirip alý sharasyn qoldandy. Aıyppul tólendi.
- Sol sııaqty sottyń jeke uıǵarymyn oryndamaǵany jáne oǵan formaldy jaýap bergeni úshin oblystyq bilim basqarmasynyń basshysyna 20 AEK kóleminde (78 640 teńge) aqshalaı óndirip alý sharasy qoldanyldy. Aıyppul tólendi. Keıinnen sottyń barlyq talaptary tıisti taldaý júrgizý jáne kináli tulǵalardy jaýapkershilikke tartý arqyly oryndaldy. Sot qaýlysy zańdy kúshine endi, - dep habarlady vedomstvodan.
Eske sala keteıik, budan buryn BQO-da jer berýde zańnamany buzǵan ákimdik qyzmetkerlerine aıyppul salynǵanyn jazǵan edik.