Sot úkimi: jýrnalısterge shabýyl uıymdastyrǵan Klebanov túrmege emes, emdelýge jiberildi

Jýrnalısterdiń kásibı qyzmetine kedergi keltirdi degen kúdikpen Arkadıı Klebanov (Manevıch) túrmege emes, psıhıatrııalyq klınıkaǵa emdelýge jiberildi, dep habarlaıdy Kazinform.

Sot jýrnalısterdiń zańdy kásibı qyzmetine kedergi keltirdi, jeke ómirge jáne derbes derekterge qol suǵylmaýshylyqty buzdy, kámeletke tolmaǵandardy qylmystyq quqyq buzýshylyq jasaýǵa tartty, bótenniń múlkine qasaqana zaqym keltirdi degen aıyp taǵylǵan Klebanovqa qatysty medıtsınalyq sıpattaǵy eriksiz emdeý sharalaryn qoldaný týraly isti qarady.

Sotta atap ótkendeı, jábirlenýshiler polıtsııa organdaryna jýrnalısterdiń qyzmetine baılanysty qaýip-qater tóndirý, buzaqylyq áreketter jasaý, múlikti zaqymdaý jáne joıý faktileri boıynsha belgisiz tulǵalarǵa qatysty ótinishpen júgingen.

Osy fakti boıynsha qylmystyq is qozǵalyp, tergeý barysynda 6 tulǵanyń osyǵan qatysty ekeni anyqtaldy.Tergeý barysynda kúdiktilerdiń birine eki sot-psıhıatrııalyq saraptamasy júrgizildi. Qorytyndylarǵa sáıkes Klebanov sozylmaly psıhıkalyq buzylysqa shaldyqqany anyqtaldy.
Sotqa deıingi tergep-tekserý qorytyndysy boıynsha oǵan qatysty materıaldar máseleni qarastyrý jáne medıtsınalyq sıpattaǵy eriksiz emdeý sharalaryn qoldaný úshin sotqa jiberildi.

«Sot saraptamalardyń qorytyndylary negizinde Klebanov qoǵamdyq qaýipti áreketterdi jasaǵan kezde qabiletsiz kúıde bolǵan degen qorytyndyǵa keldi: ol óziniń is-áreketteriniń naqty sıpaty men qoǵamdyq qaýiptiligin túsinbegen jáne sozylmaly psıhıkalyq aýrýdyń saldarynan ózin-ózi basqara almaǵan. Sottalýshy qabiletsiz dep tanylyp, psıhıatrııalyq statsıonarǵa eriksiz emdeýge jiberildi»,- dep habarlady sottan.

Jábirlenýshilerdiń azamattyq talaptary ishinara qanaǵattandyryldy. Materıaldyq zalal jáne moraldyq zııandy óteý esebine sottalýshynyń zańdy ókilinen 14 mln teńge óndirip alyndy.
Sot qaýlysy zańdy kúshine engen joq.

Eske salaıyq osy jyldyń naýryz aıynda jýrnalısterge jasalǵan shabýyldardyń tapsyrys berýshisi ustalǵan bolatyn. 

Keıin jábirlenýshilerdiń ótinishi boıynsha A.Klebanovqa qatysty sot otyrysy jabyq rejımde ótetini belgili boldy.