Sot úkimin kútken Taılandtyń eks-premeri joǵalyp ketti
ASTANA. QazAqparat -2014 jylǵy saıası daǵdarys kezinde qyzmetinen shettetilgen Taılandtyń burynǵy premer-mınıstri Iınglak Chınnavat densaýlyq jaǵdaıyn syltaýratyp, qylmystyq isine qatysty úkim jarıalanýyna kelmedi, dep habarlaıdy Lenta.rý.
Koroldik úkimetiniń vıtse-premeri Pravıt Vongsývan Chınnavattyń elden qashyp ketýi múmkin ekendigin aıtty. Onyń qazir qaıda ekendigi týraly naqty málimetter joq.
Eger 50 jastaǵy Taılandtyń eks-premeri Chınnavat kináli dep tanylsa, ony 10 jyl bas bostandyǵynan aıyrý jazasy kútip tur.
Saıasatker qazynadan joǵalǵan birneshe mıllıardtar men kúrish ósirýshi fermerlerdi sýbsıdııalaý júıesine keltirilgen shyǵyndar úshin aıyptalyp otyr. Sot úkim shyǵarýdyń jańa merzimin 27 qyrkúıekke belgiledi.
2013 jyldyń jeltoqsan aıynda Chınnavat oppozıtsııanyń qysymynan parlamentti taratyp, merziminen buryn saılaý ótkizýge kelisim berdi.
Birneshe aıdan keıingi jappaı narazylyqtan keıin, 2014 jyldyń 22 qańtarynda koroldik bıligi naýryz aıynda alynyp tastalǵan tótenshe jaǵdaı engizdi. 2014 jyldyń 7 mamyrynda Konstıtýtsııalyq sot Chınnavatty otstavkaǵa jiberdi, 22 mamyr kúni elde áskerı tóńkeris jasaldy. Áskerıler basqa saıasatkerler men qoǵam qaıratkerleriniń qatarynda ony da qamaýǵa alyp, eki kúnnen keıin qaıta bosatqan bolatyn.
