Sot úkimimen kelispeımin, shaǵym túsiremin - Eljan Birtanov
ASTANA. QazAqparat – Burynǵy densaýlyq saqtaý mınıstri Eljan Birtanov ózine shyqqan sot úkimimen kelispeıtinin aıtty, dep habarlaıdy QazAqparat tilshisi.
«Búgingi úkimge ishinara qanaǵattandym deýge bolady, sanavıatsııa epızodtary boıynsha kinásiz dep tanyldym. Al platforma epızodyna kelsek, árıne bul sheshimmen kelispeımin, meniń esh kinám joq dep esepteımin. Zańǵa sáıkes, meniń bul úkimge shaǵymdanýǵa quqyǵym bar. Biz ony mindetti túrde qoldanamyz, sondyqtan másele áli de ashyq qalady. Biz kúresýdi jalǵastyramyz, ózimizdiń durystyǵymyzdy dáleldeımiz», - dedi E. Birtanov sot otyrysynan keıin tilshilerge bergen suhbatynda.
Eks mınıstrdiń aıtýynsha, tsıfrlyq platforma boıynsha epızodta aıyptaýshy tarap nusqasy esh nársemen dáleldenbegen jáne esh aıǵaq joq.
«Bul platforma – aıtarlyqtaı tıimdi ónim, ony paıdalaný kerek jáne ony eshkim jasyrmaıdy. Sondyqtan, bizge densaýlyq saqtaý mınıstrliginiń talap aryzy túsiniksiz. O. Ábishev ekeýmiz nege 1,5 mıllıard teńge qaıtarýymyz kerek? Bul aqsha horvatııalyq kompanııanyń shotyna tústi. Eger densaýlyq saqtaý mınıstrligi óz múddesi buzyldy dep sanasa, qarajatty horvatııalyq kompanııadan óndirip alýy kerek dep oılaımyn. Horvatııalyq kompanııa da shette qalmaıdy, óıtkeni sheshimniń ózi daýly», - dedi E. Birtanov.
Eljan Birtanov qazir emotsııalarǵa oryn joqtyǵyn, advokattarymen keńesip, óz tarapynan esh qylmys jasalmaǵanynyn dáleldeıtinin aıtty.
«Bostandyǵymdy shekteý kezinde Astanada bolamyn. Jumys isteımin. Medıtsınalyq kompanııada basqarýshy bolyp jumys isteımin. Keltirilgen zalaldy qalaı óteıtinimdi josparlamadym, óıtkeni bul múmkin emes. Óte kóp qarajat. Ózderińiz eseptep kórińizder, mende bıznes joq, jaldanyp jumys isteımin. Sheshim áli kúshine engen joq. «Óltirilmegen aıýdyń terisin bólýge» áli erte. Shaǵym túsiremiz», - dedi Eljan Birtanov.
Buǵan deıin habarlaǵanymyzdaı, búgin Saryarqa aýdanynyń №2 sotynda burynǵy densaýlyq saqtaý mınıstri Eljan Birtanov pen onyń orynbasary Oljas Ábishevtiń isine qatysty sot úkimi shyqty.
Eske sala ketsek, burynǵy densaýlyq saqtaý mınıstri Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.
Tergeý materıaly boıynsha, Eljan Birtanov pen onyń orynbasary Oljas Ábishevke «Ericsson Nicola Tesla» kompanııasynyń qyzmetin qoldaný kezinde «laýazymdyq ókiletin teris paıdalaný» arqyly memleketke 1,5 mlrd teńge shyǵyn keltirdi degen aıyp taǵylǵan.
Buǵan deıin prokýror Baýyrjan Shekenov sottaǵy jaryssóz kezinde densaýlyq saqtaý mınıstrliginiń burynǵy basshysy Eljan Birtanovty 6 jylǵa bas bostandyǵynyn aıyrýdy suraǵan edi.
