Sot Trampqa Portlendke ásker jiberýge tyıym saldy

ASTANA.KAZINFORM - Oregon shtatynyń federaldy sýdıasy Tramp ákimshiligine Kalıfornııadan nemese kez kelgen basqa shtattan Ulttyq gvardııa áskerin Oregon shtatynyń Portlend kóshelerine ornalastyrýǵa tyıym saldy, dep habarlaıdy NBC News.

Jeksenbi kúngi sot otyrysynda AQSh okrýginiń sýdıasy Karın Immergýt Kalıfornııanyń Ulttyq gvardııanyń 300-ge jýyq áskerı qyzmetkeriniń Portlendke jiberilýine tosqaýyl qoıý týraly ótinishin qanaǵattandyrdy.

Aq úı málimdemesinde Kalıfornııa ulttyq gvardııasynyń áskeri Oregonǵa jiberiletini aıtylǵan.

Pentagonnyń resmı ókili Shon Parnell jeksenbide Kalıfornııa Ulttyq gvardııasy «AQSh mıgratsııa jáne keden organdaryna jáne resmı mindetterdi atqaratyn basqa federaldy qyzmetkerlerge, sonyń ishinde federaldy zańdardy oryndaýǵa jáne federaldy menshikti qorǵaýǵa qoldaý kórsetý úshin Los-Anjelesten Portlendke aýystyrylyp jatqanyn» aıtty. Oregon gýbernatory, demokrat Tına Kotek keıbir áskerler Oregonǵa senbi kúni keshke kelgenin rastady.

- Faktiler ózgergen joq. Oregonǵa ásker shaqyrýdyń qajeti joq. Portlendte tártipsizdik joq. Ulttyq qaýipsizdikke qaýip tónip turǵan joq. Oregon – bizdiń úıimiz, áskerı nysana emes. Tramp ákimshiliginiń zańsyz áreketterine qarsy turý úshin sóz bostandyǵy quqyǵyn paıdalanatyn oregondyqtar muny beıbit jolmen jasaýy kerek, - degen ol bul áreketti aıyptady.

Tehas ulttyq gvardııasynyń daıyndyq rejımine kóshkeni atalyp ótti.

Buǵan deıin Tramp Memfıske Ulttyq gvardııa áskerin kirgizý týraly jarlyqqa qol qoıǵan bolatyn.