Sot tóreligine halyqaralyq qol jetkizý týraly konventsııa qabyldandy - Parlament
ASTANA. QazAqparat - Búgin Parlament Senatynyń jalpy otyrysynda palata depýtattary «Sot tóreligine halyqaralyq qol jetkizý týraly konventsııany ratıfıkatsııalaý týraly» QR Zańyn qabyldady. Parlament qabyldaǵan qujat Memleket basshysynyń qol qoıýyna joldanady.
Atalǵan konventsııa 1980 jyly Gaagada jasalǵan. Al qujattyń maqsaty sheteldik jáne azamattyǵy joq adamnyń sot tóreligine qol jetkizýine kepildik berý bolyp tabylady. «Elbasy Joldaýynda sheteldegi azamattarymyzdyń, olardyń jeke basynyń, otbasynyń iskerlik múddesine quqyqtyq qorǵaýdy qamtamasyz etý tapsyrylǵan bolatyn. Atalǵan mindetti oryndaý úshin osy konventsııany qabyldaý mańyzdy. Konventsııaǵa sáıkes, ony qabyldaǵan elderdiń azamattaryna azamattyq jáne saýda isteri boıynsha quqyqtyq kómekter kórsetiledi, sot shyǵyndary qamtamasyz etilip, azamattardy ustaý men tıispeýshilik kepildikteri qamtylady», - dedi Ádilet mınıstri Berik Imashev.
Onyń sózine qaraǵanda, quqyqtyq kómek kórsetý týraly suraýdy oryndaý memlekettiń egemendigine, qaýipsizdigine, qoǵamdyq tártibine nuqsan keltirý múmkindigi jaǵdaıynda memlekettik kómek kórsetýden bas tartylý quqyǵy da qamtylatyn bolady.
Toqtala ketetin jaıt, Konventsııaǵa qosylý oǵan qatysatyn 31 memleketpen, onyń ishinde Azamattyq is-júrgizý týraly konventsııaǵa múshe bolyp tabylatyn 26 memleketpen yntymaqtastyqty ornatýǵa múmkindik beredi.
