Sot tóreligin iske asyrý jeńildetile túsedi - Parlament
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine sot tóreligin iske asyrýdy odan ári jeńildetý, tóreshildik rásimderdi azaıtý máseleleri boıynsha ózgerister men tolyqtyrýlar engizý týraly» zań jobasyna Senaty engizgen tolyqtyrýlardy talqylady. Ol boıynsha Májilis senatorlar túzetýine kelisim berip, qujatty qabyldady.
Esterińizge sala keteıik, zań jobasy azamattar men zańdy tulǵalardyń buzylǵan quqyqtary men zańdy múddelerin tıimdi jáne ýaqtyly qorǵaýdy qamtamsyz etýge baǵyttalyp otyr. Sonyń ishinde zań jobasymen sot tóreligin iske asyrýdy jeńildetý jáne aqparattyq tehnologııalardyń qoldanylý aıasyn keńeıtý sharalary kózdelgen. Bul rette azamattyq protseste sot otyrystarynyń aýdıo jáne beınejazba arqyly hattamaǵa túsirý qamtylǵan bolatyn.
Senat Májilis maquldaǵan zań jobasyna birqatar redaktsııalyq naqtylaý sıpatynda ózgerister engizdi. Máselen, joǵary palata depýtattary sot óndirisinde aýdıo jáne beınejazba quraldaryn qoldanýdy qarjylandyrý máseleleriniń qosymsha sheshimderin belgiledi. Osyǵan oraı, Májilis zań jobasyn maquldap, qujatty qabyldady.
Endi Parlament qabyldaǵan qujat Memleket basshysynyń qol qoıýyna joldanady.
