Sot tóreligi akademııasy magıstranttarynyń tórtten biri sýdıalyqqa laıyqsyz – Qaırat Mámı

ASTANA. QazAqparat - Sot tóreligi akademııasynyń magıstratýrasyn bitirgen 2 túlek qorytyndy memlekettik attestatsııadan óte almaǵan. Bul týraly búgin 2017 jyldyń 1 jartyjyldyǵynda sot tóreligin júzege asyrý qorytyndylaryna arnalǵan respýblıka sýdıalarynyń keńeıtilgen otyrysynda QR Joǵarǵy sotynyń tóraǵasy Qaırat Mámı aıtty, dep habarlaıdy QazAqparat.

Sot júıesin odan ary damytýdyń ózekti máseleleriniń biri sýdıa kadrlardyń kásibı biliktiligin arttyrý ekendigine basa toqtalǵan Qaırat Mámı: «Osy jyldyń basynda 2017-2020 jyldarǵa arnalǵan sot biliminiń jańa strategııasyn bekitildi. Sonymen qatar Sot tóreligi akademııasyn damytý tujyrymdasynyń jobasy ázirlendi. Akademııasynyń negizgi qyzmeti jańa farmatsııadaǵy sýdıalardy daıyndaý bolmaq. Degenmen, júrgizilgen tekserýler nátıjesi oqytý sapasy men oqý protsesin uıymdastyrýda birqatar kemshilikterdiń bar ekendigin kórsetti.  Aǵymdaǵy jyly akademııanyń alǵashqy túlekteri bitirip shyqty. Jekelegen magıstranttar alǵan biliminiń óte tómen ekendigin kórsetti», - dedi.

Onyń aıtýynsha, magıstratýra bitirgen 2 túlek qorytyndy memlekettik attestatsııany tapsyra da almaǵan.

«Atalǵan tulǵalar eki jyl boıy memleket esebinen oqyp, shákirtaqy aldy. Nátıjesinde testileý barysynda olar tómengi shekti baldy da jınaı almaǵan. Olar eki jyl boıy  birneshe márte aralyq  jáne shekti baqylaýlardy qalaı tapsyrǵan degen suraq ta týyndaıdy. Eń soraqysy, olardyń biri akademııaǵa  Joǵarǵy sot hatshylyǵynyń sektor meńgerýshisi laýazymda júrip túsken. Oqýǵa ony kim usyndy? Endi ol taǵy da bizde sektor meńgerýishsi bolyp jumys istemek pe? Nurserik Kárimuly (QR Joǵarǵy soty Sottardyń qyzmetin qamtamasyz etý departamentiniń basshysy Nurserik Sháripov) mundaı árbir fakti boıynsha qyzmettik tekserý júrgizý qajet», - dedi Joǵarǵy sot tóraǵasy.

 Qaırat Mámıdiń málimetinshe, eki jyl boıy akademııada bilim alǵan magıstranttardyń tórtten beri sýdıa laýazymyna ótkizilgen synama biliktilik emtıhanynan óte almaǵan.