Sot Taldyqorǵanda bala ólimine sebepshi bolǵan kúdiktiniń nege ızolıatorǵa qamalmaǵanyn túsindirdi
Jetisý oblysy Taldyqorǵan qalasynyń mamandandyrylǵan tergeý sotyna is 2022 jyldyń qyrkúıek aıynyń 14-i kúni túsken.
«Taldyqorǵan qalasy polıtsııa basqarmasynan QK-niń 106-baby 3-bóligimen A.A. kúzetpen ustaý bultartpaý sharasyn sanktsııalaý týraly ótinish tústi. Tergeý organdary A.A. 9 qyrkúıekte densaýlyqqa qasaqana aýyr zııan keltiretin is-áreket jasap, sonyń saldary abaısyzda bala ólimine ákep soqqan dep kúdiktenedi. Sot 14 qyrkúıekte sot qaýlysymen tergeýshiniń ótinishin qanaǵattandyrýdan bas tartyp, 1999 jyly týǵan kúdikti A.A. úıqamaq bultartpaý sharasyn qoldandy» delingen Taldyqorǵan qalasy mamandandyrylǵan tergeý sotynyń habarlamasynda.
Atalǵan qaýlyǵa myna jaǵdaılar negiz bolǵan:
Kúdikti A.A. 1999 jyly týǵan, qyz bala, turaqty mekenjaıy bar, anasymen jáne ózinen kishi baýyrlarymen birge turady, Astana qalasynda magıstratýrada oqıdy, buryn sotty bolmaǵan, tergeýden qashpaǵan, kedergi keltirmegen, kinásin moıyndaǵan, qylmystyń tek aýyr bolǵany úshin ǵana qamaý sot tájirıbesine qarama-qaıshy, QPK 136-babynyń 2-bóliginde kórsetilgendeı tek aýyrlyǵy boıynsha kúzetpen ustaý qoldanylatyn qylmysqa jatpaıdy.
Tergeý sotynyń qaýlysy Joǵarǵy Sotynyń 24 qańtar 2020 jylǵy «Bultartpaý sharalaryn sanktsııalaýdyń keıbir máseleleri týraly» normatıvtik qaýlysynyń talaptaryna saı qabyldanǵan.
«19 qyrkúıekte keltirilgen qala prokýrorynyń jeke ótinishhaty boıynsha tergeý sýdıasynyń qaýlysy materıalmen birge apellıatsııalyq tártipte qaralý úshin oblystyq sotqa joldandy»- dep habarlady sot.
Esterińizge sala keteıik, buǵan deıin Taldyqorǵanda 3 jasar balanyń ólimine qatysy bar degen kúdikpen bala kútýshiniń ustalǵanyn habarlaǵan bolatynbyz.
