Sot talabyn oryndamaǵan Atyraý ákimdiginiń bólim basshysyna aıyppul salyndy
Atyraý oblysy mamandandyrylǵan aýdanaralyq ákimshilik sotynyń málimetinshe, Atyraý qalasy ákiminiń áreketin daýlaýǵa baılanysty talap qoıý týraly ákimshilik is qaralǵan.
Atalǵan ákimshilik is boıynsha múddeli tulǵa retinde «Atyraý qalalyq jer qatynastary bólimi» MM aldyn ala sot otyrysyna shaqyrtylǵan.
«Alaıda, memlekettik mekemeniń ókili sot otyrysynyń bolatyn ýaqyty týraly tıisti túrde habarlanǵanyna qaramastan, belgisiz sebeptermen aldyn ala sot otyrsyna qatyspady. Sondyqtan sot múddeli tulǵanyń sot otyrysyna qatysý týraly talapty dáleldi sebepsiz oryndamaǵanyn eskerip, QR ÁRPK-niń 127-babynyń 4-bólimine sáıkes, «Atyraý qalalyq jer qatynastary bólimi» MM-niń basshysyna 20 aılyq eseptik kórsetkish mólsherinde aqshalaı óndirip alý sharasyn qoldandy. Bólim basshysynan 69 000 teńge kólemindegi aıyppul óndirdi», -dep habarlady sottyń baspasóz qyzmeti.
Sot uıǵarymy zańdy kúshine enip, tolyq oryndaldy.
Eske sala ketelik, budan buryn Atyraýda ákimdik qyzmetkerleri kásipkerdiń jer telimin keńeıtýden bas tartqanyn habarlaǵan bolatynbyz.
Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń baspasóz qyzmetinen málim etkendeı, kásipkerdiń jer ýchaskesin keńeıtýden bas tartqan Atyraý qalasy ákimdiginiń laýazymdy tulǵalary tártiptik jaýapkershilikke tartylǵan.
«Sheshim jer komıssııasynyń hattamasy negizinde ótinishti qaraý merzimderin buza otyryp, bas tartý týraly qaýly shyǵarmaı qabyldanǵan. Osyǵan baılanysty kásipker memlekettik organnyń sheshimine shaǵymdandy. Departament qyzmetkerleri kásipkerdiń dálelderin tekserip, kórsetilgen faktilerdi rastady. Qazir jergilikti atqarýshy organ jer telimin kásipkerge berý boıynsha máseleni qarastyryp jatyr. Kináli tulǵalar tártiptik jaýapkershilikke tartyldy», - dep habarlady departamenttiń baspasóz qyzmeti.
