Sot T.Ermegııaevten «Astana EKSPO-2017» kompanııasyna 5,9 mlrd teńgeni qaıtarý jóninde úkim shyǵardy (FOTO)
ASTANA. QazAqparat - Astana qalasynyń qylmystyq ister jónindegi aýdanaralyq mamandandyrylǵan soty Talǵat Ermegııaevke «Astana EKSPO-2017» Ulttyq kompanııasynyń paıdasyna 5,9 mlrd teńgeni qaıtarýdy úkim etti.
«Talǵat Ermegııaevten «Astana EKSPO-2017» Ulttyq kompanııasynyń paıdasyna 5 mıllıard 901 mıllıon teńge 445 myń 90 teńge qarjy alynsyn. Tumataevtan 3 mıllıon 424 myń 483 teńge, Berkinxoevten - 10 mıllıon 273 myń 449 teńge, Omarovtan - 1 mıllıard 354 mıllıon 560 myń 899 teńge, Medeýovten - 395 mıllıon 235 myń 47 teńge, Pirmetovten - 202 myń teńge, Dáýletbaevadan - 395 mıllıon 239 myń 947 teńge 75 tıyn alynsyn», - delingen sot úkiminde.
Sonymen qatar sot úkimimen Ermegııaevtiń jeke múlki de tárkilendi.
«Memleket paıdasyna Ermegııaevtiń ıeligindegi Almatydaǵy páterdi, ÝAZ avtokóligin, Almaty oblysyndaǵy eki jer telimin, Astanadaǵy páterdi, Astana qalasy Telman poselkesindegi jer ýchaskeleri tárkilensin», - dep atap ótti sýdıa.
«Ermegııaevtiń jeke múlki memleket paıdasyna alynsyn: «Sambek» JShS-daǵy Ermegııaevtiń 30% úlesin, TKM - 30%, «Globýs Almaty» - 50%, «Hozý-trans» JShS - 100%, «Rahat-avto» JShS - 18%, «Globýs Astana» - 50%, Halyq bankindegi 680 113 teńge, ATF-Bank 5 600 dollar men 39 739 eýro, 13 myń eýro jeke qarajattaryn, 2010 jáne 2014 jyly shyǵarylǵan «Leksýs-570» markaly eki kóligi, sondaı-aq 2009 jáne 2014 jylǵy «Mersedes» eki kóligi», - dedi sýdıa.
Eske sala keteıik, «Astana EKSPO-2017» Ulttyq kompanııasynyń burynǵy basshysy Talǵat Ermegııaev Astana qalasynyń qylmystyq ister jónindegi aýdanaralyq mamandandyrylǵan sotynyń úkimimen 14 jylǵa bas bostandyǵynan aıyrylǵan bolatyn. Sonymen qatar oǵan materıaldyq jaýapkershiligi joǵary memlekettik laýazymdy ıelenýge ómir boıyna tyıym salyndy jáne «Parasat» ordeni qaıtaryp alynady.
Talǵat Ermegııaev 2015 jyldyń 12 maýsymynan beri úıqamaqta bolǵan edi. Aıyptaýshynyń aqparaty boıynsha, Ermegııaevtiń ulttyq kompanııadan jymqyrǵan qarajat kólemi 10,2 mıllıard teńgeni qurap otyr. Onymen birge 22 adam sot aldynda jaýap berdi. Olardyń negizgi bóligi kompanııa qyzmetkerleri bolǵan. Qylmystyq is 540 tomǵa jetip otyr.
Sot barysynda 12 aıyptalýshy tergeýmen kelisimge kelgen. 14 aıyptalýshy óz kinálaryn moınyna aldy. Ermegııaevtiń ózi kináni moıyndaýdan bas tartty. 
