Sot isin júrgizetin nysandardyń qatary artady – Konstıtýtsııalyq reforma

ASTANA. KAZINFORM – Konstıtýtsııalyq reforma jónindegi komıssııanyń kezekti otyrysynda Konstıtýtsııalyq sot tóraǵasynyń orynbasary Baqyt Nurmuhanov Ata zańnyń sot tóreligine qatysty bólimi aıtarlyqtaı ózgeriske ushyraıtynyn aıtty.

  - Ataýy ózgergen «Sot tóreligi, prokýratýra, quqyq qorǵaý tetikteri» degen kelesi bólimde maǵynasy tereń túzetýler qarastyryldy. Onda sot bıligine qatysty mańyzdy ózgerister jasalmaq. Atap aıtqanda, sot isin júrgizý nysandarynyń qataryn arttyrý, sot tóreliginiń konstıtýtsııalyq qaǵıdattaryn kúsheıtý, sýdıalardyń táýelsizdigin nyǵaıtý, sot júıesiniń kadr máselelerin sheshý kózdeledi. Ótken otyrystarda aıtylǵan advokatýranyń quqyqtyq mártebesin Konstıtýtsııada bekitý týraly usynysty júzege asyrý úshin daıyndalǵan arnaıy baptyń jobasyna nazarlaryńyzdy aýdaramyn. Quryltaıdy bekitý, jergilikti memlekettik basqarý jáne ózin-ózi basqarý bóligine de ózgerister engizýdi talap etedi. Olar jekelegen normalarda kórinis tapty, - dedi Konstıtýtsııalyq sot tóraǵasynyń orynbasary.

Baqyt Nurmuhanov Ata zańnyń jaǵa nusqasynda Konstıtýtsııany ózgertý tártibine arnalǵan jeke bólim engiziletinin atap ótti.

- Keıbir elderde Konstıtýtsııaǵa túzetý engizý tártibin retteıtin normalar jeke bólimde shoǵyrlandyrylǵan. Qazaqstannyń qoldanystaǵy Konstıtýtsııasynda olar «Qorytyndy jáne ótpeli erejeler» atty bóliminde ornalasqan. Bul bólimniń kóptegen erejeleri ózderiniń mıssııasyn oryndap, ózektiligin joıǵan. Sondyqtan Konstıtýtsııaǵa ózgerister men tolyqtyrýlar engizýge qatysty normalardy jeke bólimde qarastyrý usynylady, - dedi ol.

Jalpy Konstıtýtsııalyq komıssııa otyrysynda partııalar qandaı usynys aıtqanyn myna silteme arqyly oqýǵa bolady.